قازاقستان مەن بەلگيا ىنتىماقتاستىقتى نىعايتۋعا نيەتتى

جۇزدەسۋ بارىسىندا تاراپتار ەكىجاقتى جانە كوپجاقتى فورماتتاعى قازاقستان-بەلگيا ىنتىماقتاستىعىنىڭ قازىرگى احۋالى مەن پەرسپەكتيۆالارىن تالقىلادى.

قازاقستان پرەزيدەنتى قاسىم-جومارت توقاەۆتىڭ باستاماسىمەن «تىڭدايتىن مەملەكەت» تۇجىرىمداماسى اياسىندا قازاقستاندا جۇرگىزىلگەن ساياسي رەفورمالاردى تالقىلاۋ سۇحباتتىڭ جەكە تاقىرىبى بولدى.

ل.ليباۋت مەملەكەت باسشىسى ۇسىنعان جاڭاشىلدىقتارعا وڭ باعا بەردى.

ەكونوميكالىق ديپلوماتيا اياسىندا سۇحباتتاسۋشىلار اۋىلشارۋاشىلىق جانە جەڭىل ونەركاسىپ سالاسىنداعى ىنتىماقتاستىق پەرسپەكتيۆالارىن تالقىلادى. سونداي-اق, تاراپتار بەلگيالىق AWEX جانە FIT ينۆەستيتسيالىق اگەنتتىكتەرىنىڭ قولداۋىمەن 2021 جىلدىڭ كۇزىندە جوسپارلانعان بەلگيالىق كاسىپورىنداردىڭ قازاقستانعا ساپارى تۋرالى ايتتى.

ۆاكتسينا جاساۋ سالاسىنداعى ىنتىماقتاستىق شەڭبەرىندە ديپلوماتتار قازاقستان مەن بەلگياداعى حالىققا ەگۋ تاجىريبەسىمەن ءبولىستى. م.بايمۇحان بەلگيالىق ارىپتەسكە قازاقستاندىق «QazVac» ۆاكتسيناسى تۋرالى اقپاراتتى ۇسىندى.

كوپجاقتى ىنتىماقتاستىق شەڭبەرىندە ەو مەن ەقىۇ اياسىنداعى ءوزارا ءىس-قيمىل ماسەلەلەرى, سونداي-اق 2021 جىلى 10 مامىردا بريۋسسەلدە وتكەن «قازاقستان رەسپۋبليكاسى - ەۋروپالىق وداق» ىنتىماقتاستىق كەڭەسىنىڭ 18-ءشى وتىرىسىنىڭ ناتيجەلەرى تالقىلاندى.

كەزدەسۋ قورىتىندىسى بويىنشا تاراپتار قازاقستان-بەلگيا قاتىناستارىن ءار ءتۇرلى باعىتتا دامىتۋ تۋرالى ۋاعدالاستى, سونىمەن قاتار ەكى ەل اراسىنداعى ءوزارا ءىس-قيمىلدى ارتتىرۋدىڭ بىرلەسكەن جوسپارلارىن بەلگىلەدى.

2005-2020 جىلداردا بەلگيانىڭ قازاقستان ەكونوميكاسىنا سالعان ينۆەستيتسياسىنىڭ كولەمى 8,9 ملرد. اقش دوللارىن قۇرادى. 2020 جىلى قازاقستان مەن بەلگيا اراسىنداعى ساۋدا كولەمى 2019 جىلمەن سالىستىرعاندا 8%-عا تومەندەپ, 322 ملن. اقش دوللارىن قۇرادى.

قازاقستاندا بەلگيا كاپيتالىنىڭ قاتىسۋىمەن 75 كومپانيا تىركەلگەن, ولار جاڭارتىلاتىن ەنەرگيا كوزدەرى, حيميالىق ونىمدەر ءوندىرىسى, ونكولوگيالىق كلينيكالارعا مەديتسينالىق جابدىقتارمەن قامتاماسىز ەتۋ سالاسىندا بىرقاتار جوبالاردى جۇزەگە اسىرادى.