اسقار مامين «لۋكويل» باسشىسىمەن ينۆەستيتسيالىق جوبالاردى تالقىلادى

تاراپتار كومىرسۋتەك شيكىزاتىن بارلاۋ, ءوندىرۋ جانە تاسىمالداۋ, سونداي-اق مۇناي وڭدەۋ جانە مۇناي-گاز حيمياسى سالالارىنداعى بىرلەسكەن ينۆەستيتسيالىق جوبالاردى ىسكە اسىرۋدىڭ جاي-كۇيى مەن پەرسپەكتيۆاسىن تالقىلادى. تشو-نىڭ بولاشاق كەڭەيتۋ جوباسى مەن ساعالىق قىسىمدى باسقارۋ جوباسىن ىسكە اسىرۋعا, قاراشىعاناق جوباسىن ودان ءارى دامىتۋعا جانە «كاسپي قۇبىر كونسورتسيۋمى» مۇناي قۇبىرىنداعى تار جەرلەردى جويۋ ماسەلەسىنە ەرەكشە نازار اۋدارىلدى. سونداي-اق «ورتالىق», «جەڭىس» جانە ء«ال-فارابي» («1-ر-2») جوبالارىن ىسكە اسىرۋ ماسەلەلەرى قارالدى.

ۆ. الەكپەروۆ ۇكىمەت باسشىسىنا الماتى وبلىسىندا 2019 جىلى اشىلعان مايلاۋ ماتەريالدارىن شىعاراتىن زاۋىتتىڭ جۇمىسى تۋرالى باياندادى. قازىرگى ۋاقىتتا كاسىپورىندا اي سايىن 3,2 مىڭ تونناعا دەيىن 700 اتاۋلى دايىن ءونىم وندىرىلەدى. 2024 جىلى 100 مىڭ توننا جوبالىق قۋاتىنا شىعۋى جوسپارلانعان.

ا. مامين «لۋكويل» جاق-تىڭ زاماناۋي ەكولوگيالىق تازا تەحنولوگيالاردى قولدانۋىن, دەنساۋلىق ساقتاۋ جانە ەڭبەك قاۋىپسىزدىگى سالاسىندا جوعارى ستاندارتتاردى ساقتاۋىن, سونداي-اق قازاقستاندا الەۋمەتتىك جوبالاردى ىسكە اسىرۋدى قامتاماسىز ەتۋىنىڭ ماڭىزدىلىعىن اتاپ ءوتتى. كەزدەسۋگە ەنەرگەتيكا ءمينيسترى نۇرلان نوعاەۆ جانە «قازمۇنايگاز» ۇك» اق باسقارما توراعاسى اليك ايدارباەۆ قاتىستى.