تاياۋدا رەسەي استاناسى – ماسكەۋدىڭ ءدال ىرگەسىندە ورنالاسقان زەلەنوگراد قالاسىندا ۆولەيبولدان ارداگەرلەر اراسىندا كسرو-عا ەڭبەك سىڭىرگەن جاتتىقتىرۋشى الەكساندر كيلچەۆسكيدى ەسكە تۇسىرۋگە ارنالعان حالىقارالىق تۋرنير ءوتتى. جىل سايىن ءداستۇرلى تۇردە ۇيىمداستىرىلىپ تۇراتىن جارىستا بۇل جولى 37 كوماندا ونەر كورسەتتى, دەپ حابارلايدى Egemen.kz.
بيىل 32 مارتە جالاۋى جەلبىرەگەن ايتۋلى جارىستا قازاق ۇلتتىق اگرارلىق ۋنيۆەرسيتەتى (قازۇاۋ) نەگىزىندە قۇرىلعان «الماتى» كلۋبى دا باق سىنادى. قۇرامىندا يگور چەكرۋسكوۆ, باقىتجان بايتورە, ۆلاديمير باننيكوۆ, رۋستام ءماسىموۆ, شوحرات ارزيەۆ جانە امرا شالبارباەۆ سىندى ساقا ويىنشىلارى بار قازاقستاندىق كوماندا شەبەرلىكتىڭ شىنايى ۇلگىسىن كورسەتتى. ءۇش كۇنگە سوزىلعان باسەكەلەر بارىسىندا رەسەيدىڭ زەلەنوگراد, بالاشيحا, سانكت-پەتەربۋرگ, سولنەچنوگورسك قالالارى جانە كالۋگا وبلىسى مەن كىل مىقتىلاردىڭ جاساقتالعان «مونوليت» كلۋبىن قاپى قالدىرعان جەرلەستەرىمىز باس جۇلدەنى جەڭىپ الدى. جارىس قورىتىندىسى بويىنشا الماتىلىق ۆلاديمير باننيكوۆ ەڭ ۇزدىك ۆولەيبولشىعا تيەسىلى ارنايى سىيلىقتى يەلەندى.
– قازاق ۇلتتىق اگرارلىق ۋنيۆەرسيتەتىندە ارداگەر ۆولەيبولشىلار كومانداسىنىڭ قۇرىلعانىنا 20 جىلعا جۋىقتاپ قالدى. سول كەزدەن بەرى ءتۇرلى دودالارعا ۇزدىكسىز قاتىسىپ كەلەمىز. ماقاتانعانىم ەمەس, ەلىشىلىك جارىستاردا ءبىزدىڭ جەڭىلگەن كەزدەرىمىز سيرەك. ماسەلەن, سوڭعى بەس-التى جىل ارالىعىندا كىل مىقتىلار جينالعان رەسپۋبليكالىق دەڭگەيدە وتكەن تۋرنيرلەردى تەگىستەي ۇتتىق. بىلتىر كۇزدە اناپادا ۇيىمداستىرىلعان رەسەيدىڭ اشىق كۋبوگىندا 16 كوماندا اراسىنان بەسىنشى ورىنعا تابان تىرەدىك. بيىل پولشادا جالاۋى جەلبىرەگەن حالىقارالىق تۋرنيردە كۇمىس مەدالدى موينىمىزعا ىلدىك. ءسوز ورايى كەلگەندە, قازۇاۋ رەكتورى تىلەكتەس ەسبولوۆ مىرزاعا زور ريزاشىلىعىمىزدى بىلدىرسەك دەيمىز. كورنەكتى عالىم تەك عىلىم مەن ءبىلىمنىڭ دامۋىنا كوڭىل ءبولىپ قانا قويماي, سپورت سالاسىندا بارىنشا دامىتۋدا. سونداي قامقورلىقتىڭ ارقاسىندا ايتۋلى ۋنيۆەرسيتەتتىڭ ۆولەيبولشىلارى ءدۇبىرلى دودالاردا اۋىز تولتىرىپ ايتارلىقتاي تابىستارعا قول جەتكىزىپ ءجۇر. تىلەكتەس يساباي ۇلىنىڭ ءوزى دە ءجيى-ءجيى ويىن الاڭىنا شىعىپ, ءتۇرلى جارىستارعا قاتىسۋدا. سونىمەن قاتار كوماندامىزدىڭ ساپىندا ايگىلى اقىن, قوعام جانە ساياسي قايراتكەر, قازاقستاننىڭ ەڭبەك ەرى ولجاس سۇلەيمەنوۆ تە ونەر كورسەتەدى. بۇل كۇندەرى ولجاس ومار ۇلى 85 جاسقا تولىپ وتىر. سوعان قاراماستان ابىز اقساقال ءالى دە بابىندا. مىنە, وسىنداي سەركەلەردىڭ بارىندا ءبىزدىڭ كوماندامىزدىڭ جەڭىلۋگە قاقىمىز جوق, – دەيدى قازۇاۋ رەكتورىنىڭ كەڭەسىشىسى, كوماندا كاپيتانى يگور چەكرۋسكوۆ.
وسى كوماندا ساپىنداعى تاعى ءبىر ويىنشىعا ەرەكشە توقتالىپ وتسەك, ەش ايىبى جوق دەپ ويلايمىز. ول – باقىتجان بايتورە. بويى 2 مەتردەن اساتىن قانداسىمىزدىڭ كەزىندە اتاعى الىسقا جايىلعانىن جانكۇيەرلەر ۇمىتا قويماعان بولار. بايتورە الماتىنىڭ «ازاماتىمەن» بىرگە ازيانىڭ كلۋبتىق چەمپيوناتىندا باس جۇلدەنى ولجالاسا, قازاقستاننىڭ ۇلتتىق قۇراماسى ساپىندا ازيا بىرىنشىلىگىنىڭ كۇمىس مەدالىن يەلەندى. 1993 جىلى قازاقتىڭ سەركە ۇلى سارى قۇرلىقتىڭ ەڭ ۇزدىك ۆولەيبولشىسى دەپ تانىلدى. ودان كەيىنگى جىلدارى باقىتجان فرانتسيانىڭ پۋك, پسج, «بوردو» جانە رەسەيدىڭ «ساموتلور» مەن «اۆتوموبيليست» سىندى بەلدى كلۋبتارى ساپىندا جاسىنداي جارقىرادى.