توكيوداعى 6 مىڭعا جۋىق دارىگەر قالاداعى كوروناۆيرۋستىڭ ءتورتىنشى تولقىنىنا بايلانىستى وليمپيادا وتكىزبەۋگە شاقىردى, دەپ حابارلايدى Egemen.kz.
وسىدان ءبىر اپتا بۇرىن جاپون كلينيكالارىنداعى دارىگەرلەر توبى وليمپيادانى قاۋىپسىز وتكىزۋدىڭ مۇمكىن ەمەستىگىن مالىمدەدى. جاپونيا تۇرعىندارىنىڭ باسىم بولىگى دە بۇل شارانى كەيىنگە قالدىرۋدى جاقتادى. ەلدەگى 47 پرەفەكتۋرانىڭ 9-ىندا توتەنشە جاعداي مامىر ايىنىڭ سوڭىنا دەيىن جاريالاندى. 125 ميلليوننان استام جاپوندىقتىڭ تەك ءۇش پايىزى كوروناۆيۋسقا قارسى ۆاكتسينانىڭ ءبىر دوزاسىن الدى. قازىر بۇل ەلدە اۋرۋحانالار تولىپ, دارىگەرلەر جۇكتەمەسى ارتا ءتۇستى.
ەسكە سالايىق, پاندەمياعا بايلانىستى 2020 جىلدىڭ تامىزىندا ءوتۋى ءتيىس توكيو وليمپياداسى كەيىنگە قالدىرىلدى. 2021 جىلدىڭ باسىندا حالىقارالىق وليمپيادا كوميتەتىنىڭ پرەزيدەنتى توماس باح بيىل وليمپيادا ويىندارى جوسپارلانعان ۋاقىتتا وتەتىنىن مالىمدەدى.
وليمپيادادا 33 سپورت تۇرىنەن 339 مەدال جيىنتىعى ساراپقا سالىنادى. سونداي-اق بيىل ءدۇبىرلى دوداعا بەيسبول, كاراتە, سەرفينگ, قۇزعا ورمەلەۋ جانە سكەيدبوردينگ سەكىلدى جاڭا سپورت تۇرلەرى قوسىلدى.
ال, قازاقستاندىق سپورتشىلار توكيو وليمپياداسىندا ەل نامىسىن سپورتتىڭ 30 تۇرىنەن قورعاۋدى جوسپارلاپ وتىر. ازىرگە قر سپورتشىلارى وليمپياداعا 53 جولداما جەڭىپ الدى.