قوستاناي وبلىسىنا قاراستى اۋليەكول اۋداندىق ءورت ءسوندىرۋ ءبولىمىنىڭ عيماراتىندا ازاماتتىق قورعانىس ارداگەرى, ىشكى قىزمەت پودپولكوۆنيگى قايىربەك قابيەۆكە مەموريالدىق تاقتا ورناتىلدى.
ەسكەرتكىش تاقتانىڭ اشىلۋ راسىمىنە جەرگىلىكتى مەملەكەتتىك ورگانداردىڭ, توتەنشە جاعداي دەپارتامەنتىنىڭ جانە اۋداندىق ورتكە قارسى كۇرەس قىزمەتىنىڭ باسشىلارى, ارداگەر ءورت ءسوندىرۋشىنىڭ تۋىستارى مەن اۋىل تۇرعىندارى قاتىستى. مەموريالدىق تاقتانى اۋدان اكىمى ەرلان تەمەنوۆ پەن قوستاناي وبلىسى تجد ارداگەرلەر كەڭەسىنىڭ توراعاسى الەكساندر مەلنيكوۆ اشتى.
سالتاناتتى شارادا اۋداندىق ءماسليحات حاتشىسى داۋلەت قويشىباەۆ قۇتتىقتاۋ ءسوز سويلەپ, جينالعان كوپشىلىككە وزگەنىڭ ءومىرى ءۇشىن تالاي مارتە وتقا كىرىپ, باتىرلىقتىڭ ۇلگىسىن كورسەتكەن داڭقتى ءورت ءسوندىرۋشىنىڭ ەڭبەك جولى تۋرالى بايانداپ بەردى.
– قايىربەك قابيەۆ وزىنە جۇكتەلگەن مىندەتتى ادال ورىنداعان وجەت ءورت ءسوندىرۋشى, بىلىكتى مامان ەدى. ونىڭ سىندارلى ساتتە قىزىل جالىننىڭ اراسىنان تالاي ادامدى امان الىپ شىققان كوزسىز باتىرلىعىن بۇگىنگى وسكەلەڭ ۇرپاققا ونەگە ەتۋىمىز كەرەك. ءوز ىسىنە بەرىلگەن, قىسىلتاياڭ كەزدە ءابجىل قيمىلدايتىن شەبەر ءورت ءسوندىرۋشىنىڭ ەڭبەگى ەلەنىپ, كەزىندە جوعارى ماراپاتتارعا يە بولدى. ەندى, مىنە, بۇگىن باتىرعا كەيىنگى بۋىن ارىپتەستەرى لايىقتى قۇرمەت كورسەتىپ, ەسكەرتكىش تاقتا ورناتىپ جاتىر. بۇل كۇن ەرلىك ەسكەرىلىپ, باتىرلىق باعالانعان كۇن رەتىندە ەل ەسىندە ساقتالادى, – دەدى داۋلەت قويشىباەۆ.
ەڭبەك جولىن ءورت كۇزەتىنىڭ ينسپەكتورى بولىپ باستاعان قايىربەك قابيەۆ توتەنشە جاعداي قىزمەتى سالاسىندا ۇزاق جىل قاتارداعى ءورت ءسوندىرۋشى بولىپ قىزمەت اتقاردى. كەيىن باسشىلىق قىزمەتكە اۋىسىپ, اۋليەكول, قۇسمۇرىن اۋىلدارىندا جانە امانقاراعاي بەكەتىندە ءورت ءسوندىرۋ بولىمشەلەرىن جاساقتادى.
قوستاناي وبلىسى