ۇكىمەت باسشىسى دۇنيەجۇزىلىك بانكتىڭ ۆيتسە-پرەزيدەنتىمەن كەزدەستى

تاراپتار قر مەن دۇنيەجۇزىلىك بانكتىڭ تسيفرلىق تەحنولوگيالار, قارجى, ينفراقۇرىلىم, ەنەرگەتيكا, اۋىل شارۋاشىلىعى, ەكولوگيا, ادامي كاپيتالدى, شاعىن جانە ورتا بيزنەستى دامىتۋ سەكىلدى سالالارداعى جوبالاردى ىسكە اسىرۋداعى ىنتىماقتاستىق پەرسپەكتيۆالارىن, سونداي-اق قازاقستان ەكونوميكاسىنا پاندەميا سالدارىن بارىنشا ازايتۋ ماسەلەلەرىن تالقىلادى.

دۇنيەجۇزىلىك بانك وكىلدەرى قر ۇكىمەتىنىڭ COVID-19-عا قارسى كۇرەس, كاسىپكەرلىكتى قولداۋ جانە ناتيجەلى جۇمىسپەن قامتۋ بويىنشا قابىلداپ جاتقان شارالارىنا جوعارى باعا بەردى, بۇل 2021 جىلدىڭ 4 ايىنىڭ قورىتىندىسى بويىنشا قازاقستان ەكونوميكاسىنىڭ ءوسۋ تراەكتورياسىنا شىعۋىنا مۇمكىندىك بەردى. ەكونوميكانىڭ ناقتى سەكتورىنداعى تۇراقتى جانە جوعارى ءوسۋ قارقىنى, ەلدىڭ ءجىو-دەگى وڭدەۋ ونەركاسىبى ۇلەسىنىڭ ارتۋى, سونداي-اق كورسەتىلەتىن قىزمەتتەر سەكتورىنداعى قالپىنا كەلتىرۋ سەرپىنى ەرەكشە اتالىپ ءوتتى.

كەلىسسوزدەر قورىتىندىسى بويىنشا ناتيجەگە باعدارلانعان مال شارۋاشىلىعىن تۇراقتى دامىتۋ باعدارلاماسى بويىنشا قارىز تۋرالى كەلىسىمگە قول قويىلدى.

قۇجات حالىقارالىق قايتا قۇرۋ جانە دامۋ بانكىنىڭ قازاقستانعا ۆەتەريناريالىق قىزمەت پەن جانۋارلاردى ەسەپكە الۋ جۇيەسىن جەتىلدىرۋگە, فەرمەرگە باعدارلانعان قىزمەت كورسەتۋ مودەلىن كەڭەيتۋگە, سونداي-اق ەتتى مال شارۋاشىلىعى سەكتورى ءۇشىن «جاسىل ءوسىم» ساياساتىن ىسكە اسىرۋعا 460 ملن ەۋرو ءبولۋىن كوزدەيدى.

جوبانى ىسكە اسىرۋ مەرزىمى – 2021-2025 جىلدار. كەزدەسۋگە پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, قارجى ءمينيسترى ەرۇلان جاماۋباەۆ, ۇلتتىق ەكونوميكا ءمينيسترى اسەت ەرعاليەۆ, اۋىل شارۋاشىلىعى ءمينيسترى ساپارحان وماروۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين قاتىستى.

1992 جىلدان باستاپ دۇنيەجۇزىلىك بانك قازاقستاندا قارجى, ينفراقۇرىلىم, ەنەرگەتيكا, اوك, كوممۋنالدىق قىزمەت كورسەتۋ سەكتورى, اT جانە باسقا سالالاردى دامىتۋ جونىندەگى 55-تەن اسا مەملەكەتتىك جوبانىڭ ىسكە اسىرىلۋىن قارجىلاندىردى.