ەسىرتكى ساتقان كۇدىكتى ەكىباستۇزداعى ۋاقىتشا ۇستاۋ يزولياتورىنا قامالدى, دەپ حابارلايدى Egemen.kz
«قر ءىىم قاج كوميتەتى مەن پاۆلودار وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ جەدەل قىزمەت قىزمەتكەرلەرى پاۆلودار وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرىمەن بىرلەسىپ ماريحۋانا جەتكىزۋشىلەردىڭ جولىن كەستى», دەپ حابارلادى پاۆلودار وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ ءباسپاسوز قىزمەتى.
پاۆلودار وبلىسىنىڭ شىدەرتى كەنتىندە ورنالاسقان قاۋىپسىزدىگى ەڭ تومەن اپ-162/10 مەكەمەسىندە جازاسىن وتەپ جاتقان سوتتالعاندارعا ەسىرتكى ساتتى دەگەن كۇدىكپەن 45 جاستاعى ازامات ۇستالعان.
«اتالعان فاكتى بويىنشا قر قك 297-بابى ءبىرىنشى بولىگى بويىنشا سوتقا دەيىنگى تەرگەۋ باستالدى. كۇدىكتى ەكىباستۇز قالاسىنىڭ ۋاقىتشا ۇستاۋ يزولياتورىنا قامالدى», دەپ تولىقتىردى پاۆلودار وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ اعا جەدەل ۋاكىلى ارمان قالىقوۆ.