شىعىس قازاقستان وبلىسى التاي اۋدانىنداعى جاڭا بۇقتىرما كەنتىندە بىرنەشە ءۇيدى قىزىل جالىن شارپىدى, دەپ حابارلايدى Egemen.kz قازاقپاراتقا سىلتەمە جاساپ.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, 11 مامىر كۇنى ساعات 16:48-دە جاڭا بۇقتىرما كەنتىندە ورنالاسقان دەمالىس بازالارىنىڭ بىرىندە شىققان ءورت لەزدە 8 ۇيگە, ءدامحانا شاتىرى مەن مونشاعا جايىلىپ كەتكەن.
- وقيعا ورنىنا ءورت سوندىرۋشىلەر شۇعىل كەلىپ جەتتى. الدىن الا مالىمەت بويىنشا ءتىلسىز جاۋدىڭ جالپى اۋدانى 409 شارشى مەتردى قۇراپ وتىر. ماماندار ءورتتىڭ شىعۋ سەبەپتەرىن انىقتاپ جاتىر. زارداپ شەككەن ەشكىم جوق, - دەپ حابارلادى ۆەدومستۆو وكىلدەرى.
قازىرگى ۋاقىتتا سول جەردە جەكە قۇرامنان 48 ادام, 6 اۆتوتسيستەرنا, جەرگىلىكتى اتقارۋشى ورگاننىڭ 5 وكىلى جۇمىس ىستەۋدە.