قتج پويىزداردىڭ كەشىگۋىنە قاتىستى تۇسىنىكتەمە بەردى

كومپانيا ءباسپاسوز قىزمەتىنىڭ مالىمدەۋىنشە, قازىرگى كەزدە «قتج» ۇك» اق جەلىسىندە تەمىرجولدى جوندەۋ بويىنشا جوسپارلى جۇمىس جۇرگىزىلىپ جاتىر.

«جوندەۋ جۇمىستارىنا بايلانىستى بەلگىلى ءبىر ۋچاسكەدە پويىزدار جىلدامدىعى كەستەدە قاراستىرىلعان جىلدامدىقپەن سالىستىرعاندا شەكتەلۋى مۇمكىن. بۇگىنگى تاڭدا 84,7 شاقىرىم جولعا كۇردەلى جوندەۋ جۇرگىزىلدى. 14,6 شاقىرىم جول كۇشەيتىلگەن ورتاشا جوندەۋدەن ءوتتى. 34,5 شاقىرىمدا رەلس تىرەۋىن جانە 4 شاقىرىمدا جولتاباندى جاپپاي اۋىستىرۋ جۇرگىزىلدى», دەلىنگەن حابارلامادا.

جۇمىستى ورىنداۋ كەزىندە اۋىر تيپتەگى جوعارى ءونىمدى ماشينالار: Duomatic تۇزەتۋ جانە قاعۋ ماشيناسى, DGS جول تۇراقتاندىرعىشى, RM قيىرشىق تاستى تازارتۋ ماشيناسى جانە باسقالارى قولدانىلعان.

«2021 جىلى بارلىعى 580 شاقىرىمنان استام تەمىرجول كۇردەلى جوندەۋدەن وتكىزىلەدى. ەڭ كوپ جۇمىس كولەمى قاراعاندى, جامبىل ماگيسترالدىق جەلى بولىمشەلەرىنىڭ ۋچاسكەلەرىندە جوسپارلانعان. ينفراقۇرىلىمدى جاڭعىرتۋ قوزعالىس قاۋىپسىزدىگىن, جولاۋشىلار مەن جۇك پويىزدارىنىڭ جىلدامدىعىن ارتتىرۋعا باعىتتالعان», دەلىنگەن حابارلامادا.

«قازاقستان تەمىر جولى» ۇلتتىق كومپانياسى كەلتىرىلگەن قولايسىزدىق ءۇشىن جولاۋشىلاردان كەشىرىم سۇراي وتىرىپ, قالىپتاسقان جاعدايعا تۇسىنىستىكپەن قاراۋدى سۇرادى.