اسقار مامين: ەاەو پاندەميادان كەيىنگى قالپىنا كەلۋ كەزەڭىنە وتۋدە

ء«بىزدىڭ ەلدەرىمىز داعدارىستان كەيىنگى قالپىنا كەلۋ كەزەڭىنە بىرتىندەپ كوشىپ جاتىر. ەلدەرىمىز جۇزەگە اسىرىپ جاتقان جاپپاي ۆاكتسينالاۋ قارقىنىن دايەكتى تۇردە ارتتىرۋ قىسقا مەرزىمدى پەرسپەكتيۆادا ەاەو-نىڭ قازىرگى داعدارىستان شىعۋى تۋرالى ايتۋعا مۇمكىندىك بەرەدى», دەدى ا.مامين.

ۇكىمەت باسشىسى ەۋرازيالىق ەكونوميكالىق وداق ەلدەرى اراسىنداعى ءوزارا ساۋدا كورسەتكىشتەرىنىڭ جاقسارعانىن, وندىرىستىك سالاداعى ءوسىمنىڭ قالپىنا كەلۋىن جانە قىزمەت كورسەتۋ سەكتورىنداعى ىسكەرلىك بەلسەندىلىكتىڭ ارتقانىن اتاپ ءوتتى. بيىلعى قاڭتار-اقپان ايلارىندا ەاەو-نىڭ ءوزارا ساۋداسى $9 ملرد قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 6,8%-عا ارتىق.

پرەمەر-مينيستر ورتاق وندىرىستىك جۇيەلەردى قالىپتاستىرۋ قارقىنىن ەداۋىر جەدەلدەتۋ, ونەركاسىپتىك كووپەراتسيانى, ەاەو-نىڭ قايتا وڭدەۋ الەۋەتىن ارتتىرۋ جانە شوعىرلاندىرۋ قاجەتتىگىن اتاپ ءوتتى.

ء«بىزدىڭ ەلدەرىمىز ەلەكتروموبيلدەرگە ارنالعان باتارەيالاردى, سيرەك كەزدەسەتىن مەتالداردى, «جاڭا ماتەريالداردى», قوسىلعان قۇنى جوعارى اوك ونىمدەرىن جانە ت. ب. قوسا العاندا, ونىمدەر مەن قىزمەتتەردىڭ بارلىق دەرلىك ستراتەگيالىق ماڭىزدى تۇرلەرى بويىنشا وندىرىستەردى قالىپتاستىرۋدا كۇشەيىپ كەلە جاتقان باسەكەلەستىككە قوسىلۋ تۇرعىسىنان ادامي دا, رەسۋرستىق تا الەۋەتكە يە», دەدى ا. مامين.

قازاقستان ۇكىمەتىنىڭ باسشىسى ونەركاسىپتىك كووپەراتسيا جوبالارىن, ونىڭ ىشىندە مەملەكەتتىك جانە كۆازيمەملەكەتتىك قاراجاتتىڭ قاتىسۋىمەن قارجىلاندىرۋدىڭ قوسىمشا كوزدەرىن قالىپتاستىرۋدىڭ ماڭىزدىلىعىن اتاپ ءوتتى. بيىل 28 ساۋىردە قول قويىلعان قازاقستان, رەسەي جانە بىرىككەن اراب امىرلىكتەرىنىڭ تىكەلەي ينۆەستيتسيالار قورلارى اراسىنداعى تەڭ ينۆەستيتسيالاۋ تۋرالى كەلىسىمدى مىسال رەتىندە كەلتىردى.

پرەمەر-مينيستر تاۋارلار مەن قىزمەتتەردىڭ ءوزارا ساۋداسىنا جاساندى كەدەرگىلەر جاساۋعا جول بەرمەۋ, شەكارالاردان ءوتۋ راسىمدەرىنىڭ تيىمدىلىگىن ارتتىرۋ, مونيتورينگ جانە باقىلاۋ جۇيەلەرىنىڭ دەرەكتەرىمەن الماسۋ جۇمىسىن كۇشەيتۋگە شاقىردى.

ەاەو اياسىندا ينفراقۇرىلىمنىڭ ساپاسى مەن قولجەتىمدىلىگىن ارتتىرۋ جۇمىسىن جالعاستىرۋدىڭ ماڭىزدىلىعى اتاپ ءوتىلدى. ۇكىمەت باسشىسى قالىپتاسقان باعىتتاردىڭ سەنىمدىلىگىنە جانە جەكەلەگەن وڭىرلەردىڭ ترانزيتتىك الەۋەتىنە قاتىستى بەلگىسىزدىككە بايلانىستى الاڭداۋشىلىقتىڭ وسۋىنە وراي حالىقارالىق كولىك اعىندارىن اۋقىمدى قايتا ءبولۋدى ەسكەرە وتىرىپ, ەاەو-نىڭ حالىقارالىق تاسىمالداۋ نارىعىنداعى ءوز ۇلەسىن ۇلعايتۋعا جانە بۇعان دەيىن قولجەتىمسىز بولعان سىرتقى وندىرىستىك تىزبەكتەرگە قوسىلۋعا مۇمكىندىگى بار ەكەنىن اتاپ ءوتتى.

«اتالعان قارقىن ءبىزدىڭ ترانزيتتىك كورسەتكىشتەرىمىز ارقىلى كورىنىس بەرۋدە. 2020 جىلى پاندەمياعا قاراماستان, ەاەو اۋماعى ارقىلى قىتاي-ەۋروپا-قىتاي باعىتى بويىنشا كونتەينەرلىك تاسىمالداردىڭ ءوسۋى 64%-دى (511,8 مىڭ جفە) قۇرادى. وسى جىلدىڭ العاشقى ءۇش ايىندا ءوسىم 133%-دى (147 مىڭ دەف) قۇرادى», دەدى ا.مامين.

وتىرىس بارىسىندا ونەركاسىپتىك ىنتىماقتاستىقتىڭ 2025 جىلعا دەيىنگى نەگىزگى باعىتتارى بەكىتىلدى. قۇجات ورتاق نارىقتىڭ الەۋەتى نەگىزىندە ەاەو-عا مۇشە مەملەكەتتەردىڭ ونەركاسىپتىك ءوندىرىسىنىڭ وزىق ءوسۋىن ىنتالاندىرۋعا, ەاەو-عا مۇشە مەملەكەتتەردىڭ ونەركاسىپتىك كاسىپورىندارىنىڭ باسەكەگە قابىلەتتىلىگىن ارتتىرۋعا, بىرلەسىپ وندىرىلگەن تاۋارلاردىڭ سىرتقى نارىقتاردا ەكسپورتىن ىلگەرىلەتۋگە, يننوۆاتسيالاردى جانە ونەركاسىپتىڭ تسيفرلىق ترانسفورماتسياسىن بىرلەسىپ ىنتالاندىرۋ جولىمەن ونەركاسىپتىك ءوندىرىستى تەحنولوگيالىق دامىتۋدىڭ جاڭا دەڭگەيىنە وتۋگە باعىتتالعان.

جەردى قاشىقتان زوندتاۋدىڭ ينتەگراتسيالانعان عارىش جۇيەسىن قالىپتاستىرۋ, ءوزارا ساۋداداعى كەدەرگىلەردى ودان ءارى جويۋ, ءۇشىنشى ەلدەرمەن ەلەكتروندىق ساۋدانى رەتتەۋ ءتارتىبى, ەاەو اۋىل شارۋاشىلىعى ونىمدەرىنىڭ نارىعىن وسىمدىكتەردىڭ قاۋىپتى ۆيرۋستارىنىڭ تارالۋىنان قورعاۋ ماسەلەلەرى جانە باسقا دا ماسەلەلەر قارالدى.

ەۋرازيالىق ەكونوميكالىق كوميسسيا مەن وزبەكستان ۇكىمەتى ءوزارا ءىس-قيمىل تۋرالى مەموراندۋمعا جانە ونى ىسكە اسىرۋ جونىندەگى ءىس-شارالار جوسپارىنا قول قويدى.

سونداي-اق وتىرىسقا ارمەنيا پرەمەر-ءمينيسترىنىڭ مىندەتىن اتقارۋشى نيكول پاشينيان, بەلارۋس ۇكىمەتىنىڭ باسشىسى رومان گولوۆچەنكو, قىرعىزستان ۇكىمەتىنىڭ باسشىسى ۋلۋكبەك ماريپوۆ, رەسەي ۇكىمەتىنىڭ باسشىسى ميحايل ميشۋستين, تاجىكستان ۇكىمەتىنىڭ باسشىسى كوحير راسۋلزودا, وزبەكستان ۇكىمەتىنىڭ باسشىسى ابدۋللا اريپوۆ, مولدوۆا پرەمەر-ءمينيسترىنىڭ مىندەتىن اتقارۋشى اۋرەلي چوكوي (ونلاين-رەجيمدە), تۇرىكمەنستان مينيسترلەر كابينەتى توراعاسىنىڭ ورىنباسارى سەردار بەردىمۋحامەدوۆ قاتىستى. كۋبا پرەمەر-ءمينيسترى كرۋس مانۋەل ماررەرو بەينە مالىمدەمە جاسادى.