تاۋەلسىزدىك جىلدارىندا كوپتەگەن جاڭا باستاما قولعا الىندى. سولاردىڭ اراسىندا قازاقستان حالقى اسسامبلەياسىن قۇرۋ ءىسى ەرەكشە اتالادى. ەلباسىنىڭ باستاماسىمەن قۇرىلعان ۇيىم بۇگىنگە دەيىن ەل بىرلىگى مەن تاتۋلىعىنىڭ نىشانى بولىپ كەلەدى.
ءبىز تاعى ءبىر تاريحي ساتكە كۋا بولدىق. ەلباسى نۇرسۇلتان نازارباەۆتىڭ قازاقستان حالقى اسسامبلەياسىنىڭ توراعاسى لاۋازىمىن مەملەكەت باسشىسى قاسىم-جومارت توقاەۆقا تابىستاعانىن كوردىك. دەمەك, اسسامبلەيا ءوز جۇمىسىن ءارى قاراي سەنىمدى تۇردە جالعاستىرا بەرەدى, سارا جول ساباقتاستىقپەن جالعاسىن تابادى دەپ سەنەمىز. تاتۋلىق, بىرلىك, كەلىسىم سىندى قۇندىلىقتار ودان ءارى ناسيحاتتالادى دەپ ويلايمىن. ءبىزدىڭ ءبىرىنشى بايلىعىمىز – ەلدىڭ تاتۋلىعى. بۇل قاي ۋاقىتتا دا ماڭىزىن جوعالتپاۋى كەرەك.
تاۋەلسىزدىك جىلدارى قانشاما اۋقىمدى جۇمىستار اتقارىلعانىنا ءبارىمىز كۋامىز. قازاقستان حالقى اسسامبلەياسى بۇگىنگە دەيىن وتە جاقسى مودەل قالىپتاستىرا الدى دەپ ويلايمىن. ول تەك بەيبىتشىلىك ۇيىتقىسى بولىپ قانا قويماي, ماڭىزدى ساياسي الاڭعا اينالدى. اسسامبلەيا ارقىلى ەلىمىز بەيبىتشىلىك جارشىسى اتاندى.
قازاقستان حالقى اسسامبلەياسىنىڭ ءححىح سەسسياسى بارىسىندا ەلباسى اتاپ وتكەندەي, بۇگىندە ءبىزدىڭ اسسامبلەيامىزدىڭ مودەلىن باسقا ەلدەر دە ەنگىزىپ جاتىر. بۇل – ۇلكەن جەتىستىك دەپ بىلەمىن. ويتكەنى قۇندىلىقتار وزگەرىپ جاتقان قازىرگى زاماندا ەلدىڭ تۇتاستىعى مەن حالىقتىڭ بىرلىگى تاقىرىبى كۇن تارتىبىنەن تۇسپەۋى كەرەك.
ايتا كەتۋ كەرەك, اسسامبلەيا پاندەميا كەزىندە دە تىنباي جۇمىس ىستەدى. اسسامبلەيا مۇشەلەرى ۆولونتەرلەرمەن قاتار, العى شەپتە قىزمەت ەتكەن مەديتسينا, قۇقىق قورعاۋ ورگاندارىنىڭ قىزمەتكەرلەرىنە جاردەمدەسىپ, كوپتەگەن وتباسىعا كومەك بەردى. بۇل ىزگى ءىس ءالى دە جالعاسادى. اسسامبلەيانىڭ العا قويعان يگى ماقساتى كوپ.
گەننادي شيپوۆسكيح,
پارلامەنت ءماجىلىسىنىڭ دەپۋتاتى