«قامقورلىق» وڭالتۋ ورتالىقتارى كوبەيەدى

ەرەكشە قاجەتتىلىكتەرى بار بالالارعا ارنالعان ورتالىق ەلباسى نۇرسۇلتان نازارباەۆتىڭ «قامقورلىق» باستاماسى اياسىندا قۇرىلدى. مەكەمە بىلتىر تاۋەلسىزدىك كۇنى قارساڭىندا اشىلعان. نۇرسۇلتان نازارباەۆ قورىنىڭ ديرەكتورى, پارلامەنت ءماجىلىسىنىڭ دەپۋتاتى داريعا نازارباەۆا جانە الماتى وبلىسىنىڭ اكىمى اماندىق باتالوۆ ورتالىق جۇمىسىنىڭ العاشقى ناتيجەسىمەن تانىستى. ولار وڭالتۋ كابينەتتەرىن ارالاپ, قىزمەتكەرلەرمەن جۇزدەستى.

الماتى وبلىسى جامبىل اۋداندىق ورتالىق اۋرۋحاناسىنداعى (ۇزىناعاش اۋىلى, قاراساي باتىر كوشەسى, 259) عيماراتتىڭ ەكى قاباتىندا ورنالاسقان ورتالىقتىڭ اۋماعى – 800 شارشى مەتر. مۇندا تسەرەبرالدى پاراليچ, اۋتيزم, ەپيلەپسيا, اقىل-ويى كەم, سويلەۋ ءتىلى دامىماعان, برونحوكپە مەن جۇرەك-قان تامىرلارى جۇيەسى اۋرۋلارى بار بالالار ەم قابىلدايدى. يننوۆاتسيالىق تەحنولوگيالارعا نەگىزدەلگەن ساپالى ءارى ءتيىمدى كەشەندى وڭالتۋدان وتۋگە جاعداي جاسالعان. بالالار مەن اتا-انالار مەديتسينالىق ەمدەۋ شارالارى, تۇزەتۋ ساباقتارى, ويىن-ساۋىق ساۋىقتىرۋعا ارنالعان بولمەلەرمەن قامتىلعان.

قازىرگى تاڭدا جامبىل مەن جاقىن ماڭداعى اۋداندارمەن قاتار, الماتى قالاسىنان جانە وزگە دە وبلىستان كەلگەن 50 بالا اتا-اناسىمەن بىرگە وڭالتۋدان ءوتىپ جاتىر. تسەرەبرالدى سال اۋرۋىنا شالدىققان ءبىر جارىم جاستاعى باتىرحاننىڭ اناسى مەكەمە جۇمىسىنا ءدان ريزا. ماڭعىستاۋ وبلىسىنىڭ تۇرعىنى ءبىر كەزدەرى ۇزىناعاشتا تۇرعان جانە «قامقورلىق» ورتالىعىنىڭ اشىلۋىن بىلگەن اجەسىنىڭ ايتۋىمەن ارنايى كەلگەن ەكەن. كەلىنشەك نۇرسۇلتان نازارباەۆ قورىنىڭ ديرەكتورى ەرەكشە قاجەتتىلىگى بار بالالار مەن اتا-انالارىنا كورسەتكەن كومەگىنە شىن جۇرەكتەن العىس ايتىپ, ۇلىنىڭ وڭالتۋدان كەيىنگى جاعدايىن باياندادى. قازىر بالاسى سەلقوس جاتۋدى قويعان, توسەكتەن وزدىگىنەن ءتۇسىپ, اياعىن جەرگە تىرەي الادى, ەڭبەكتەۋگە تىرىسادى.

– مۇندا ءۇش اپتالىق كۋرستان ءوتىپ جاتىرمىز. بارلىق جەردە ەم-دوم قابىلداۋ اقىلى ءارى ءبىز ءۇشىن وتە قىمبات, ال تەگىنىنە ۇزىن-سونار كەزەكتىڭ كەسىرىنەن كىرە المايمىز. ال بۇل ورتالىقتا بارلىعى جوعارى دەڭگەيدە ءارى تەگىن. ەڭ اۋەلى ورتالىقتىڭ ماماندارىنا العىس ايتامىن. تالاي جەردە بولدىق, سالىستىرىپ ايتارىمىز بار. بۇل ەڭ ۇزدىك ورتالىق, – دەدى ايالانىڭ اناسى جىبەك قاني.

جەتى جاستاعى نۇرسۇلتان شەرالىنىڭ اجەسى فاتيما دا كەشەن ماماندارىنىڭ جوعارى كاسىبيلىگىنە ءتانتى. «نەمەرەم 15 كۇن بويى وڭالتۋ كۋرسىنان ءوتىپ جاتىر. اياعىن باسا المايتىن, قازىر ەم-شا­را ارقىلى قاز-قاز باسىپ كەلەدى. رەۆما­تولوگ, ماسساج, تەراپيا سىندى وتە جاقسى كەشەندى ەم الۋدا», دەيدى ول.

ايتا كەتەيىك, ورتالىق جىل سايىن ەرەكشە قاجەتتىلىگى بار 600 بالانى تەگىن قابىلداۋعا ءازىر.

– بۇل – 2020 جىلى ەلباسىنىڭ باستا­ماسىمەن «قامقورلىق» جوباسى اياسىندا اشىلعان 8 وڭالتۋ ورتالىعىنىڭ ءبى­رى. بيىل نۇرسۇلتان نازارباەۆ قورى وسى باعدارلامانىڭ ءبىرىنشى كەزەڭىن ىسكە اسىرۋ بارىسىندا جيناقتالعان تاجى­ري­بەنى قولدانا وتىرىپ, وڭالتۋ مودەلىن باسقا ايماقتارعا پايدالانۋدا. شاعىن قالالار مەن اۋدان ورتالىقتارىندا قوسىمشا 10 ورتالىق اشۋ جوسپاردا, وڭالتۋ قىزمەتىنىڭ ساپاسىن ارتتىرىپ, ورتالىق جۇمىسىنىڭ تۇراقتىلىعىن قامتاماسىز ەتەتىن ماماندار دايارلاۋعا باسا ءمان بەرىپ وتىرمىز, – دەيدى «قامقورلىق» كورپوراتيۆتىك قورىنىڭ ديرەكتورى ارايلىم ەركىنوۆا.

ۇزىناعاش كەنتىندەگى ورتالىقتا 126 بالا وڭالتۋ كۋرسىنان ءوتتى. جالپى, تۇڭعىش پرەزيدەنت ن.نازارباەۆتىڭ باستاماسىن جۇزەگە اسىرۋ بارىسىندا 2020 جىلدىڭ جەلتوقسانىنان 2021 جىلدىڭ ناۋرىزىنا دەيىنگى ارالىقتا سەگىز «قامقورلىق» ورتالىعىندا 1 186 بالا ەم-شارا الدى.

الماتى وبلىسىنا جۇمىس ساپارى اياسىندا د.نازارباەۆا ۇزىناعاش اۋىلىنداعى پەرزەنتحاناعا دا باردى. وندا نۇرسۇلتان نازارباەۆ قورىنىڭ ديرەكتورىنا (ەلەكتروكارديوگرافيا, ۋلترادىبىستىق دياگنوستيكالىق جۇيە, ساندىق رەنتگەن جانە فليۋوروگرافيالىق اپپاراتتار جانە 12 ارنالى ەكگ اپپاراتى) سىندى قاجەتتى مەديتسينالىق قۇرىلعىلار ورناتىلعان اۆتوبۋستار, ياعني 17 جىلجىمالى مەديتسينالىق كەشەن تانىستىرىلدى.

ءاربىر مەديتسينالىق اۆتوبۋستا جالپى قابىلداۋ بولمەسى, اكۋشەر-گينەكولوگ, ساۋلەلىك دياگنوستيكا, جالپى تاجىريبە دارىگەرىنىڭ بولىمشەسى, ءدارىحانا, اناليز قابىلداۋ ايماعى جانە ءپورتاتيۆتى ۋلترادىبىستىق ەكسپەرت سىنىبى ءارى حالىقتى ۆاكتسينالاۋعا ارنالعان بەكەتتەر دە بار.

د.نازارباەۆانىڭ جۇمىس ساپارى شامالعان اۋىلىنداعى سپورت-ساۋىقتىرۋ كەشەنى مەن تۇڭعىش پرەزيدەنت – ەلباسىنىڭ «اتامەكەن» تاريحي-مادەني ورتالىعىن ارالاۋمەن اياقتالدى.