بۇگىن, 24 ساۋىردە فۋتبولدان پرەمەر-ليگا كوماندالارى اراسىنداعى ەل بىرىنشىلىگىنىڭ جەتىنشى تۋرى مارەسىنە جەتتى, دەپ حابارلايدى Egemen.kz.
سوڭعى ويىندا شىمكەنتتە «ورداباسى» مەن قىزىلوردانىڭ «قايسار» كوماندالارى كەزدەستى. وڭتۇستىك ءوڭىردىڭ ەكى كلۋبى اراسىنداعى كەزدەسۋ تارتىستى ءوتتى.
ەسەپتى العاش بولىپ «ورداباسى» شابۋىلشىسى جواو پاولو 21-مينۋتتا اشتى. ودان كەيىن قىزىلوردالىق كلۋبتان كاروليس لاۋكجەميس 25, 36-مينۋتتاردا قوس گول سوعىپ, ءوز كومانداسىن العا شىعاردى. وسىلايشا ءبىرىنشى كەزەڭ «قايساردىڭ» باسىمدىلىعىمەن اياقتالدى.
ەكىنشى كەزەڭدە الاڭ يەلەرى قاتارىنان تيمۋر دوسماعامبەتوۆ 61-مينۋتتا مەرگەندىك تانىتسا, 63-مينۋتتا جواو پالو ءوزىنىڭ ەكىنشى گولىنىڭ اۆتورى اتاندى. ال 88 -مينۋتتا رۋبەن بريدجيدو قورىتىندى ەسەپتى بەلگىلەدى. «ورداباسى» قارسىلاسىن 4:2 ەسەبىمەن تىزە بۇكتىردى. ناتيجەسىندە تۋرنير كەستەسىندە «قايراتتى» ارتقا تاستاپ, ءتورتىنشى ورىنعا كوتەرىلدى.