سەناتور مۇحتار جۇماعازيەۆ جۇمىس پروتسەسىنىڭ تومەن دەڭگەيدە ۇيىمداستىرىلۋى, ەڭبەك ەتۋگە قاراپايىم جاعدايدىڭ جاسالماۋى, ماتەريالدىق-تەحنيكالىق بازانىڭ جەتكىلىكسىزدىگى, جالاقىنىڭ تومەندىگى ۆەتەرينار مامانداردىڭ قىزمەت ەتۋگە ىنتاسىنىڭ ازايۋىنا اسەر ەتەتىنىن ايتىپ, ۇكىمەت باسشىسىنا دەپۋتاتتىق ساۋال جولدادى, دەپ حابارلايدى Egemen.kz.
دەپۋتات كەلتىرگەن اقپاراتقا ساي, ۆەتەرينارلىق ستانسالاردىڭ باسىم كوپشىلىگى مامانداردىڭ جەكە ۇيىندە, جالعا الىنعان عيماراتتاردا ورنالاسقان.
وسى سالاداعى مامانداردىڭ ورتا جاسى 50-55, كەيدە ءتىپتى 59 جاسقا جەتىپ قالعانىن ەسكەرە وتىرىپ, دەپۋتات پرەمەر-ءمينيستردىڭ ءبىرىنشى ورىنباسارىنىڭ جەرگىلىكتى دەڭگەيدەگى كۆازيمەملەكەتتىك سەكتور قىزمەتكەرلەرىنىڭ سانىن 25 پايىزعا قىسقارتۋ تاپسىرماسىمەن ۆەتەرينارلاردى قىسقارتۋدى بەلسەندى جۇزەگە اسىرىلۋىن سىنعا الدى.
سەناتوردىڭ ايتۋىنشا, بۇل ماماندىقتىڭ بولاشاعى تۋرالى اقپارات تا كوڭىل قۋانتپايدى. «بولاشاق» باعدارلاماسىمەن وسى سالادا 12 ادام عانا شەت ەلدەردە وقىعان. ولاردىڭ باسىم بولىگى ماماندىق بويىنشا جۇمىسقا ورنالاسپاعان. ەلدەگى جوو ۆەتەريناريا بويىنشا تۇلەكتەردىڭ جۇمىسقا ورنالاسۋى 2018 جىلى 79 پايىز بولسا, 2020 جىلى 50,3 پايىزدى قۇراعان.
«ديپلوممەن – اۋىلعا» مەملەكەتتىك باعدارلاماسىندا قويىلعان ماقساتتاردى ىسكە اسىرۋ شارالارى ەشقانداي سىن كوتەرمەيدى. سوڭعى 5 جىلدا وسى باعدارلاما اياسىندا 1875 جاس مامان جۇمىسقا ورنالاسقان. ولارعا اۋىلدا جۇمىس ىستەۋگە قاجەتتى جاعداي جاسالسا, قىزمەتتىك تۇرعىن ۇيلەر بەرىلىپ, الەۋمەتتىك جەڭىلدىكتەر قاراستىرىلسا, ماتەريالدىق-تەحنيكالىق بازا كۇشەيتىلسە – كادر ماسەلەسى ءوز شەشىمىن تاپقان بولار ەدى», دەدى مۇحتار جۇماعازيەۆ.
سەناتور ءوز ساۋالىندا اگروونەركاسىپتىك كەشەن ءۇشىن كادر دايارلاۋعا مەملەكەتتىك ءبىلىم بەرۋ تاپسىرىسىن قالىپتاستىرۋ بويىنشا قۇزىرەتتى ءبىلىم جانە عىلىم مينيسترلىگىنەن الىپ, اۋىل شارۋاشىلىعى مينيسترلىگىنە بەرۋ قاجەتتىگىنە نازار اۋداردى. وسى ماماندىق بويىنشا اۋىل جاستارى ءۇشىن گرانتتار سانىن ارتتىرىپ, ۆەتەرينارلاردىڭ جالاقىسىن ءوسىرۋ, ولاردىڭ ماتەريالدىق-تەحنيكالىق جابدىقتارىن جەتىلدىرۋ ماسەلەلەرىنىڭ وزەكتىلىگىن دە اتاپ ءوتتى.