بۇرىنعى دەنساۋلىق ساقتاۋ ءمينيسترى ەلجان بىرتانوۆقا بەلگىلى ءبىر ۋاقىتقا ۇيىنەن شىعۋىنا رۇقسات بەرىلدى. بۇل تۋرالى ونىڭ ادۆوكاتى دميتري كۋرياچەنكو ايتتى, دەپ حابارلايدى Egemen.kz.
«سانكتسيا بويىنشا ەلجان ءبىرتانوۆتىڭ ۇيقاماق مەرزىمى 14 مامىرعا دەيىن سوزىلدى. وعان ساعات 08.00 مەن 19.00 ارالىعىندا ۇيدەن شىعۋىنا رۇقسات بەرىلدى», دەدى د. كۋرياچەنكو.
اقپان ايىندا ادۆوكات ۇيقاماقتا وتىرعان ەكس-ءمينيستردىڭ ۇيىنە شاشتارازدى كىرگىزۋگە تىيىم سالىنعانىن ايتقان بولاتىن. بۇگىن جەلىدە التى ايدان بەرى ۇيقاماقتا وتىرعان ەلجان ءبىرتانوۆتىڭ فوتوسى تارادى.
ەسكە سالا كەتەيىك, ەلجان ءبىرتانوۆ بۇگىنگى سوت وتىرىسىندا ءوزىنىڭ كىناسىز ەكەنىن ايتىپ, سوتتان بوساتۋىن سۇراعانىن جاريالاعان ەدىك.
ايتا كەتەيىك, 2020 جىلدىڭ 3 قاراشاسىندا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ بيۋدجەت قارجىسىن ىسىراپ ەتتى دەگەن كۇدىكپەن قاماۋعا الىنعان بولاتىن. وسى جىلدىڭ اقپان ايىندا نۇر-سۇلتان قالاسىنىڭ اۋدانارالىق تەرگەۋ سوتى ەكس-ءمينيستردى ۇيقاماقتا ۇستاۋ مەرزىمىن 2021 جىلدىڭ ناۋرىز ايىنىڭ سوڭىنا دەيىن ۇزارتتى, كەيىن ءساۋىر ايىنىڭ 30-نا دەيىن تاعى سوزعان ەدى.
ال ناۋرىز ايىنىڭ سوڭىندا بۇرىنعى باس دارىگەردىڭ قورعاۋشىسى دميتري كۋرياچەنكو باق-قا سۇحبات بەرىپ, ءبىرتانوۆتىڭ دەنساۋلىعى سىر بەرگەنىن جانە ونى ۇيقاماقتا نەگىزسىز ۇستاپ وتىرعانىن ايتقان.