ارالاس جەكپە-جەكتەن الەمدەگى ەڭ بەدەلدى ۇيىم – UFC كەشە الەمنىڭ ەكس-چەمپيونى يرلانديالىق كونور ماكگرەگور مەن امەريكالىق ايگىلى فايتەر داستين پورە اراسىنداعى ءۇشىنشى ايقاس وتەتىنىن رەسمي تۇردە مالىمدەدى.
ەكى ۇزدىك اراسىنداعى كەزدەسۋ 10 شىلدەدە اقش-تىڭ لاس-ۆەگاس قالاسىندا وتەدى دەپ بەلگىلەنگەن. ماكگرەگور مەن پورە UFC 264 ءتۋرنيرىنىڭ باستى جەكپە-جەگىندە جۇدىرىقتاسسا, اتالعان جارىستىڭ اندەركاردىندا وتانداسىمىز جالعاس جۇماعۇلوۆ وسى ۇيىمداعى ءوزىنىڭ ءۇشىنشى ايقاسىن وتكىزەدى.
ايتا كەتەيىك, ماكگرەگور مەن پورە بۇعان دەيىن سەگىزبۇرىشتا ەكى رەت كەزدەسىپ, ەكەۋى دە ءبىر-ءبىر جەكپە-جەكتە جەڭىسكە جەتكەن. العاش 2014 جىلى وتكەن باسەكەدە يرلانديالىق فايتەر مەرزىمىنەن بۇرىن جەڭىسكە جەتسە, 2021 جىلدىڭ قاڭتارىنداعى سايىستا پورە قارسىلاسىن ەكىنشى راۋندتا تەحنيكالىق نوكاۋتپەن ۇتقان ەدى.