الماتى قالاسىنىڭ وڭىرلىك كوممۋنيكاتسيالار قىزمەتى الاڭىندا وتكەن جۇزدەسۋدە كلينيكالىق جانە فۋندامەنتالدى مەديتسينا اكادەميگى, اسفەندياروۆ اتىنداعى قازۇمۋ ەپيدەميولوگيا كافەدراسىنىڭ جانە قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ پروفەسسورى ساكەن امىرەەۆ كوروناۆيرۋسپەن اۋىرىپ-جازىلعان تۇرعىنداردى كوروناۆيرۋسقا قارسى ۆاكتسينا الۋعا شاقىردى, دەپ حابارلايدى Egemen.kz.
عالىمنىڭ سوزىنشە, ەكپە المايىنشا ادامداردىڭ «يممۋندىق اسەرى» ءالسىز بولادى. ال ەكپەدەن سوڭ ازاماتتاردىڭ 95%-ىندا كوروناۆيرۋسقا قارسى تۇرا الاتىن يممۋنيتەت قالىپتاسادى.
«ۆاكتسينالار رەسەيدە نەمەسە قازاقستاندا, ياعني قاي جەردە وندىرىلگەنىنە قاراماستان, جاقسى يممۋندىق اسەرگە يە, سوندىقتان ءبىزدىڭ مىندەتىمىز – حالىققا ۆاكتسيناتسيادان قورىقپاۋ كەرەكتىگىن ءتۇسىندىرۋ. سەبەبى بۇكىل الەمدە ۇجىمدىق يممۋنيتەتتى تەك ۆاكتسيناتسيا ارقىلى قالىپتاستىرا الامىز», دەپ اتاپ ءوتتى ساكەن امىرەەۆ. سپيكەر ءوزى دە ۆاكتسينانىڭ ءبىرىنشى كومپونەنتىن العانىن جانە ودان كەيىن ەشقانداي جاناما اسەر بايقاماعانىن, الايدا ونىڭ جۇبايىندا ۆاكتسيناتسيادان كەيىن جەڭىل السىزدىك بەلەڭ العانىن ايتتى. پروفەسسوردىڭ پايىمىنشا, ءار ورگانيزم ءار ءتۇرلى, سوندىقتان كەيبىر جاناما اسەرلەردىڭ پايدا بولۋى قالىپتى قۇبىلىس.
«وكىنىشكە قاراي, ءالى دە ۆاكتسينانىڭ تيىمدىلىگىنە سەنبەيتىندەر كوپ.تاريحقا جۇگىنسەك, شەشەككە قارسى ۆاكتسينا جاساۋ كەزىندە دە وعان قارسى شىققاندار بولعان. الايدا, جاپپاي ۆاكتسيناتسيانىڭ ارقاسىندا عانا شەشەك اۋرۋىن جەڭۋ قولدان كەلدى. ۆاكتسيناتسياعا سەنىمسىزدىك تانىتۋ جاساندى تۇردە قولدان جاسالىپ وتىر. ءبىز بۇل ماسەلەگە وركەنيەتتى تۇردە قاراۋىمىز كەرەك جانە ادامزات سوعىسقا قاراعاندا, ينفەكتسيالاردان جاپپاي قىرىلعانىن ۇمىتپاعانىمىز ءجون. مىسالى, ءبىز تۋبەركۋلەزدى مەنينگيتكە قارسى بتسج ۆاكتسيناسىن قولدانامىز, ول اعزانى ينفەكتسيانىڭ وزىنەن ەمەس, اۋرۋدىڭ اۋىر سالدارىنان قورعايدى. ازىرگە بىزدە ۆاكتسيناتسيادان باسقا كوروناۆيرۋستان قورعانۋدىڭ ءتيىمدى ءادىسى جوق», دەيدى امىرەەۆ.
پروفەسسور, جۇرگىزىلىپ جاتقان ەگۋ ناۋقانىنا قاراماستان, بەتپەردە رەجىمى مەن قورعانۋدىڭ باسقا دا ادىستەرىن ساقتاۋدى ۇجىمدىق يممۋنيتەت قالىپتاسقانعا دەيىن جالعاستىرۋ كەرەك دەپ ەسەپتەيدى. سونىمەن قاتار, كوروناۆيرۋسپەن اۋىرىپ-جازىلعان ادامدار ۆاكتسيناتسيا الۋدى كەشىكتىرمەۋى كەرەك, ويتكەنى ولاردىڭ انتيدەنەلەرى ۆاكتسيناتسيا العاننان كەيىنگىدەي كۇشتى بولمايدى. «شىندىعىندا, باسقا اۋرۋلارمەن اۋىرعان ادامداردا يممۋنيتەت قالىپتاسادى, بىراق كوروناۆيرۋس جاعدايىندا ولاي ەمەس. كۆي اۋرۋىنان كەيىن جاقسى يممۋنيتەت قالىپتاسپايدى. كوپتەگەن قازاقستاندىقتار اۋىر فورماسىمەن اۋىردى, بۇل كلينيكالىق تۇرعىدان دالەلدەندى. مۇنداي ادامدار قايتادان جۇقتىرۋلارى مۇمكىن, ولاردىڭ ينفەكتسيادان كەيىنگى قورعانىس انتيدەنەلەرى ءالسىز كەلەدى. ولاردا جاد جاسۋشالارى قالىپتاسادى, بىراق سونىمەن بىرگە انتيدەنەلەر ازايادى. ازىرگە بۇكىل الەمدىك قاۋىمداستىق ۆاكتسينانى ەكى رەت ەنگىزۋ كەرەك دەگەنگە توقتادى. سوندىقتان, كەرى تارتىپ ەكپە سالدىرۋدى كەشەۋىلدەتۋدىڭ ەش قاجەتى جوق», دەيدى ساكەن امىرەەۆ.