تەننيستەن ەرلەر اراسىنداعى ەڭ ءىرى حالىقارالىق تۋرنير سانالاتىن دەۆيس كۋبوگىنىڭ فورماتى بيىل دا وزگەردى. 2019 جىلدان باستاپ اتالعان ءتۋرنيردىڭ فينالدىق سايىستارى تەك ءبىر قالادا, ياعني مادريدتە (يسپانيا) وتكىزىلىپ كەلسە, بيىلدان باستاپ ءۇش قالادا وتكىزىلەتىن بولدى.
قازاقستان تەننيس فەدەراتسياسىنىڭ مالىمەتى بويىنشا, وسى جىلدان باستاپ دەۆيس كۋبوگىنىڭ توپتىق كەزەڭى بيىلعى 25 قاراشا مەن 5 جەلتوقسان كۇندەرى مادريد, تۋرين (يتاليا) جانە ينسبرۋك (اۋستريا) قالالارىندا وتەدى. قازاقستان قۇراماسى كانادا جانە شۆەتسيا تەننيسشىلەرىمەن «ۆ» توبىندا مادريدتە سىنعا تۇسەدى.
سونداي-اق پيرەنەي تۇبەگىندە «ا» توبىنىڭ وكىلدەرى – يسپانيا, رەسەي جانە ەكۆادور قۇرامالارى دا باق سىنايدى. وعان قوسا ءتۋرنيردىڭ جارتىلاي جانە فينالدىق باسەكەلەرى دە ءدال وسى يسپانيانىڭ باس شاھارىندا وتەدى. ال ينسبرۋكتا «C» جانە «F», تۋريندە «D» جانە «ە» توپتارى سىنعا تۇسەدى. سونىمەن قاتار ەكى قالادا ءبىر-ءبىر شيرەك فينالدان وتەدى.