«قازاقستاننىڭ تەڭ قۇقىقتار مەن مۇمكىندىكتەر ينستيتۋتى» قوعامدىق قورىنىڭ پرەزيدەنتى مارگاريتا وسكەمباەۆا تۇرمىستىق زورلىق-زومبىلىق قۇربانى بولعان ايەلدەردىڭ 40 پايىزدان استامى كۇيەۋلەرىنە قايتا ورالاتىنىن ايتادى.
«داعدارىس ورتالىقتارىنىڭ قىزمەتىن جەتىلدىرۋ, وتباسىلىق-تۇرمىستىق زورلىق-زومبىلىقتىڭ الدىن الۋ جانە اگرەسسورلارمەن جۇمىس ىستەۋ جونىندەگى شارالاردى ازىرلەۋ جانە ىسكە اسىرۋ» رەسپۋبليكالىق جوباسىنىڭ باستالۋىنا ارنالعان ونلاين ءباسپاسوز-كونفەرەنتسياسىنا اقدم جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ, «ازاماتتىق باستامالاردى قولداۋ ورتالىعى» باسقارماسى ءتورايىمى ليما دياس جانە باسقا دا قوعام قايراتكەرلەرى قاتىستى.
ARASHA باسپانا مىسالىندا (الماتى ق.) ءبىز تۇرمىستىق زورلىق- زومبىلىق قۇربانى بولعان ايەلدەردىڭ 40%-دان استامى اگرەسسور جۇبايلارىنا ورالاتىنىن كورەمىز. ونىڭ ءارتۇرلى سەبەپتەرى بار – ءبىرى سۋىماعان سەزىمدەرىنىڭ جەتەگىندە كۇيەۋىنە قايتا كەلەدى, ءبىرىنىڭ باراتىن جەرى جوق. كۇيەۋى تۇزەلۋگە ۋادە بەرەدى. وسى ايەلدەردىڭ جارتىسى ومىرلەرىن جاڭادان باستاپ وتباسىندا قالادى, ەكىنشى جارتىسى قايتادان بىزگە جۇگىنەدى», دەيدى م.وسكەنباەۆا.
وسىعان بايلانىستى, اتالعان جوبانى ىسكە اسىرۋ اياسىندا اگرەسسورلارمەن جۇمىس ىستەۋدىڭ پراكتيكالىق ادىستەرى نۇسقاۋلىقتار مەن ارەكەتتەر الگوريتمىن جاساۋ ارقىلى قولدانىلادى.
«جوبا تۇرمىستىق زورلىق-زومبىلىقتىڭ الدىن الۋعا جانە قازاقستانداعى جاعدايدى جاقسارتۋ بويىنشا كەشەندى شارالار قابىلداۋعا باعىتتالعان. مىسالى, داعدارىس ورتالىقتارىنىڭ قىزمەتىن جەتىلدىرۋ. ءبىز ولاردىڭ ەلىمىزدىڭ بارلىق وڭىرىندە جۇمىس ىستەيتىنىن بىلەمىز, تۇرمىستىق زورلىق-زومبىلىق قۇرباندارىنا الەۋمەتتىك قىزمەتتەر كورسەتۋدىڭ ستاندارتى بار. بىراق ولاردىڭ ناقتى سانى ءالى بەلگىسىز. جوبا اياسىندا قور العاش رەت ەلىمىزدىڭ 10 اسكەري وقۋ ورنىندا اقپاراتتىق-ءتۇسىندىرۋ ناۋقانىن جۇرگىزەتىن كۇش ۆەدومستۆولارىنىڭ وتستاۆكاداعى قىزمەتكەرلەرىن ەرلەرمەن اڭگىمەلەسۋگە تارتادى. وندا ەر ادامدار ءبىلىم الادى – بولاشاق پوليتسەيلەر, اسكەريلەر. ARASHA تاجىريبەسىندە كۇشتىك قۇرىلىم وكىلدەرى وتباسىندا اگرەسسور بولعان جاعدايلار بولدى. ولار ەموتسياعا بەرىلمەي, ماسەلەنى كۇش قولدانۋ ءادىسى ارقىلى شەشۋگە ۇيرەنگەن. جۇمىسى اۋىر. ۇيگە كەلىپ, ايەلىنە, بالالارىنا مىنەز كورسەتەدى. ال تاڭەرتەڭ دىم بولماعانداي گۇل بەرىپ كەشىرىم سۇرايدى جانە ءارى قاراي ءومىر سۇرە بەرەدى. ايەلدەر مۇنداي جاعدايعا كونىپ, ونداعان جىلدار بويى سولاي ءومىر سۇرۋگە ءماجبۇر» دەيدى م.وسكەنباەۆا.
ليما دياس ءوز سوزىندە تۇرمىستىق زورلىق-زومبىلىق قۇرباندارىنا كومەك كورسەتۋ جونىندەگى داعدارىس ورتالىقتارىنا العىس ءبىلدىردى. «وسى جوبا اياسىندا سەرىكتەس بولعان داعدارىس ورتالىقتارىنا شىن جۇرەكتەن العىسىمدى بىلدىرەمىن. بۇگىندە اتالعان ورتالىقتار قارجىلىق قيىندىقتارعا قاراماستان, تۇرمىستىق زورلىق-زومبىلىق قۇرباندارىنىڭ قۇپيالىلىعىن, تۇرعىن ءۇي, پسيحولوگيالىق, زاڭدىق جانە الەۋمەتتىك كومەك تۇرعىسىنان كەشەندى قولداۋدى قامتاماسىز ەتۋدە», دەدى ول.
سونداي-اق جوبا شەڭبەرىندە وڭىرلەردە تۇرمىستىق زورلىق-زومبىلىقتىڭ الدىن الۋ تەتىكتەرىن جەتىلدىرۋ جونىندەگى العاشقى رەسپۋبليكالىق جوبالىق كەڭسە قۇرىلادى. اگرەسسورلاردىڭ قولىنان زارداپ شەككەن 500 ايەل مەن ولاردىڭ بالالارىنا پسيحولوگيالىق كومەك كورسەتىلەدى. وسى جوبانى ىسكە اسىرۋ شەڭبەرىندە اگرەسسورلارمەن جۇمىس ىستەۋگە وقىتۋ بويىنشا ترەنينگتەر مەن ۆەبينارلار جوسپارلانعان: ايەلدەردى زورلىق-زومبىلىقتان قورعاۋ جونىندەگى 75 ينسپەكتور جانە كامەلەتكە تولماعاندارمەن جۇمىس جونىندەگى ينسپەكتور بارلىق وڭىردە وقۋدان ءوتىپ, ءوز بىلىكتىلىگىن ارتتىرادى.
ەسكە سالا كەتەيىك, جوبا ازاماتتىق باستامالاردى قولداۋ ورتالىعى مەن اقپارات جانە قوعامدىق دامۋ مينيسترلىگىنىڭ گرانتتىق قولداۋىمەن جۇزەگە اسىرىلۋدا. ال الماتى قالاسىنداعى تۇرمىستىق زورلىق-زومبىلىق قۇرباندارىنا ارنالعان ARASHA باسپاناسى – 2017 جىلعى 1 شىلدەدەن باستاپ جۇمىس ىستەيتىن «قازاقستاننىڭ تەڭ قۇقىقتارى مەن تەڭ مۇمكىندىكتەرى ينستيتۋتى» قوعامدىق قورىنىڭ الەۋمەتتىك جوباسى. مۇندا ايەلدەر پسيحولوگيالىق, زاڭگەرلىك كومەك الادى, جۇمىسقا ورنالاسادى نەمەسە ماماندىق الۋعا كومەكتەسەدى. ءوز جۇمىسىنىڭ باسىنان باستاپ 2021 جىلعى 1 ساۋىرگە دەيىن ARASHA باسپاناسى تۇرمىستىق زورلىق-زومبىلىققا ۇشىراعان 418 جانعا كەشەندى قولداۋ كورسەتتى.