بيىلعى ءساۋىر ايىندا حالىق قاھارمانى, پوليتسيا كاپيتانى عازيز بايتاسوۆ ءتىرى بولعاندا ەردىڭ جاسى ەلۋگە تولاتىن ەدى. ول 2011 جىلى تاراز قالاسىندا قاۋىپتى تەرروريستى ۇستاۋ كەزىندە ەرلىكپەن قازا تاپقان بولاتىن. باتىردىڭ تۋعان كۇنىنە وراي, «جەڭىس» ساياباعىندا عازيز بايتاسوۆقا ارنالعان ەسكەرتكىش اشىلدى. ونىڭ ەسىمى قۇقىق قورعاۋ ورگاندارى قىزمەتكەرلەرىنىڭ اراسىندا حالىق قاھارمانى اتاعىن العان العاشقى ءارى جالعىز ادام رەتىندە دە قۇرمەتپەن اتالادى.
ەسكەرتكىشتىڭ اشىلۋ سالتاناتىنا قاتىسقان جامبىل وبلىسىنىڭ اكىمى بەردىبەك ساپارباەۆ عازيز بايتاسوۆ مىندەتىنە ادالدىق پەن كوزسىز ەرلىكتىڭ سيمۆولى بولىپ قالا بەرەتىنىن ايتسا, ەلىمىزدىڭ ىشكى ىستەر ءمينيسترىنىڭ ورىنباسارى ارىستانعاني زاپپاروۆ تاۋەلسىزدىك جىلدارى قىزمەت بابىندا قۇقىق قورعاۋ ورگاندارىنىڭ 800-گە جۋىق قىزمەتكەرى كوز جۇمعانىن, تاراز قالاسىندا اشىلعان بۇل ەسكەرتكىش ازاماتتاردىڭ قاۋىپسىزدىگى جولىندا قازا تاپقاندارعا جاسالعان تاعزىم ەكەنىن جەتكىزدى. شارا بارىسىندا قىزمەت بابىندا قايتىس بولعان ازاماتتاردى ەسكە الۋ ءۇشىن ءبىر مينۋت ۇنسىزدىك جاريالانىپ, ءۇش مارتە اۆتوماتپەن ساليۋت بەرىلدى.
بۇدان كەيىن وبلىستىق ءماسليحاتتىڭ حاتشىسى ماحمەتعالي سارىبەكوۆ باۋىرجان مومىش ۇلى مەن عازيز بايتاسوۆتىڭ ەرلىكتەرىن بايلانىستىرسا, وبلىستىق پوليتسيا دەپارتامەنتىنىڭ باستىعى جانات سۇلەيمەنوۆ عازيز بايتاسوۆتىڭ ەرلىگى بارلىق پوليتسەيلەر ءۇشىن ۇلگى ەكەنىن ايتا كەلىپ, باتىر ەسىمى ۇمىتىلمايتىنىن جانە ەرلىكپەن كوز جۇمعان پوليتسەيدىڭ وتباسىنا جان-جاقتى قولداۋ كورسەتىلىپ وتىرعانىن جەتكىزدى. سونداي-اق, باتىردىڭ جەسىرى گۇلجامال تاجيەۆا عازيز بايتاسوۆتى ەسكە الۋعا ارنالعان شارالارعا ۇنەمى شاقىرتۋ الاتىنىن ايتىپ, ول ءۇشىن ريزاشىلىعىن جەتكىزىپ, ول بارلىق قازاقستاندىقتار ءۇشىن باتىر بولىپ قالا بەرەتىنىن اتاپ ءوتتى.
شارا سوڭىندا حالىق قاھارمانى عازيز بايتاسوۆتىڭ ەسكەرتكىشىنە گۇل شوقتارى قويىلدى.
جامبىل وبلىسى