بۇگىن ءماجىلىستىڭ جالپى وتىرىسىندا اۋىل شارۋاشىلىعى ءمينيسترى ساپارحان وماروۆ جەر قاتىناستارى ماسەلەلەرى تۋرالى زاڭ جوباسىن تالقىلاۋ كەزىندە ەلىمىزدە قانشا جەر القابى شەتەلدىكتەرگە جالعا بەرىلگەنىن ناقتىلادى, دەپ حابارلايدى Egemen.kz
«زاڭ جوباسىنا سايكەس, 2016 جىلعى 1 شىلدەگە دەيىن, ياعني موراتوري ەنگىزىلگەنگە دەيىن بەرىلگەن اۋىل شارۋاشىلىعى ماقساتىنداعى جەر ۋچاسكەلەرىنە ۋاقىتشا جەر پايدالانۋ قۇقىعى شەتەلدىك جەر پايدالانۋشىلارعا, شەتەلدىك قاتىسۋ ۇلەسى بار بىرلەسكەن كاسىپورىندارعا جانە قانداستارعا جالداۋ مەرزىمى اياقتالعانعا دەيىن قولدانىلادى ءارى ۇزارتىلۋعا جاتپايدى. وسىنداي ادامداردىڭ سانى جانە ولار يەلەنەتىن اۋىل شارۋاشىلىعى جەرلەرىنىڭ الاڭدارى تۋرالى دەرەكتەر بار ما, سونداي-اق ولاردىڭ جالداۋ مەرزىمى قاشان اياقتالادى», دەپ سۇرادى دەپۋتات فاحريددين قاراتاەۆ.
بۇل ورايدا اۋىل شارۋاشىلىعى ءمينيسترى مۇنداي جەرلەر قازىرگى كەزدە قازاقستاندا بار ەكەنىن ايتتى.
«اتاپ ايتقاندا, 74,4 مىڭ گەكتار اۋىل شارۋاشىلىعى جەرى 7 بىرىككەن كاسىپورىنعا جالعا بەرىلگەن. ودان باسقا ەكى شەتەلدىك زاڭدى تۇلعا 18,5 مىڭ گەكتار جەردى بۇگىنگى كۇنى جالعا الىپ وتىر. بۇلاردىڭ بارلىعى موراتوري ەنگىزىلگەنگە دەيىنگى الىنعان جەرلەر. ولاردىڭ جالعا الۋ مەرزىمى 2022 جىلدان 2025 جىلعا دەيىن. وسى ۋاقىت وتكەننەن كەيىن بۇل جەرلەردىڭ بارلىعى مەملەكەتكە قايتارىلادى», دەدى س.وماروۆ.
ودان وزگە, پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى. زاڭ جوباسىمەن اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا, شەتەلدىك ۇلەسى بار قازاقستاندىق كومپانيالارعا, ازاماتتىعى جوق ادامدارعا, حالىقارالىق قاتىسۋى بار عىلىمي ورتالىقتارعا, سونداي-اق قانداستارعا بەرۋگە تولىق تىيىم سالۋ كوزدەلگەن.
سونىمەن قاتار زاڭ جوباسىندا بۇدان بۇرىن شەتەلدىكتەرمەن جانە شەتەلدىك ۇلەسى بار قازاقستاندىق كومپانيالارمەن جالعا الىنعان اۋىل شارۋاشىلىعى جەرلەرىنىڭ پايدالانۋ مەرزىمىن ۇزارتىلمايتىندىعى جانە ولاردىڭ پايدالانۋ مەرزىمى اياقتالعانعا دەيىن عانا يەلىكتە بولاتىندىعى قاراستىرىلعان.
س.وماروۆتىڭ ايتۋىنشا, قانداستار بويىنشا ولار جەكە قوسالقى شارۋشىلىعى, باۋ-باقشا جانە ساياجاي قۇرىلىسى ءۇشىن جەر ۋچاسكەسىن الا الادى, اۋىل شارۋاشىلىعى جەرلەرىن قازاقستان ازاماتتىعىن العاننان كەيىن عانا جالعا الۋعا مۇمكىندىگى بار.