اللا قالاسا, ەندى از كۇننەن كەيىن مۇسىلماندار ءۇشىن قاسيەتتى سانالعان رامازان ايىنىڭ 30 كۇن ورازاسى باستالادى. بۇل ۋاقىت – تاڭنان قارا كەشكە دەيىن ءنار تاتپاي, جاماندىقتان بويىڭدى اۋلاق ۇستاپ, جاننىڭ دا, ءتاننىڭ دە رۋحاني تازاراتىن كەزى.
ءدىن ماماندارى رامازان ايىنا اسا ۇقىپتىلىقپەن قاراپ, ۇلكەن دايىندىقپەن كەلۋ كەرەك ەكەندىگىن ايتادى. ال ءبىز 30 كۇن ورازاعا دايىنبىز با؟ قالاي دايىن بولۋىمىز كەرەك؟ بۇل تۋرالى ەلورداداعى رەسپۋبليكالىق ازىرەت سۇلتان مەشىتىنىڭ نايب يمامى باقىتجان وتكەلباەۆ ءتۇسىندىرىپ بەردى.
«پايعامبارىمىزدىڭ (س.ع.س.) ء«يا, راببىم, بىزگە ەرەجەپ پەن شاعبان ايلارىن بەرەكەلى ەتە گور. ءبىزدى رامازان ايىنا امان-ەسەن جەتكىزە گور» دەگەن دۇعاسى بار. بۇل ەكى اي – رامازان ايىنا دەيىنگى دايىندىق ايلار. رامازان ايىندا بىردەن تاعامنان تىيىلۋ ادام اعزاسىنا دا, ناپسىسىنە دە اۋىر سوعۋى مۇمكىن. سوندىقتان الدىڭعى ەكى ايدا مۇمكىندىگىنشە ءجيى ءناپىل ورازالار ۇستاپ, قۇلشىلىقتى ارتتىرعان ابزال. زامانىندا پايعامبارىمىز (س.ع.س.) وسى ايلاردا وتە ءجيى ورازا ۇستاپ, قۇلشىلىعىن كوبەيتكەن ەكەن. ءبىز دە رامازانعا دەيىنگى ەرەجەپ پەن شاعبان ايلارىندا كۇنىمىزدى ورازامەن, ءتۇنىمىزدى قۇلشىلىقپەن وتكىزسەك, ساۋابى كوبىرەك بولادى. بۇل پارىز ەمەس ءناپىل بولعاندىقتان, بۇل ەكى ايدا ورازا ۇستاۋ مىندەتتى ەمەس, بىراق ۇستاعان ساۋاپ بولادى. دەگەنمەن, رۋحاني تازارىپ, رامازان ايىنا دايىندىقپەن كەلگەن كىسىگە ورازادا كوپ جەڭىل بولادى. يمامداردىڭ «رامازان ايىنا دايىندالۋ كەرەك» دەيتىندەرى وسى», دەيدى يمام.