سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى و.بەكتەنوۆ اكىمشىلىك سىبايلاس جەمقورلىق قۇقىق بۇزۋشىلىقتاردىڭ ناقتى قۇرامى تۋرالى ەگجەي-تەگجەيلى ايتا كەلە, مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن نەمەسە وعان تەڭەستىرىلگەن تۇلعالاردىڭ جاۋاپكەرشىلىگى تۋرالى باياندادى, دەپ حابارلايدى Egemen.kz.
اتاپ ايتقاندا, ءوزى نەمەسە دەلدال ارقىلى زاڭسىز ماتەريالدىق سىياقىنى, سىيلىقتاردى نەمەسە كورسەتىلەتىن قىزمەتتەردى ۇسىنعان ادامداردىڭ پايداسىنا ارەكەتتەرى (ارەكەتسىزدىگى) نەمەسە جەڭىلدىكتەر بەرۋ ءۇشىن, ەگەر مۇنداي ارەكەتتەردە قىلمىستىق جازالاناتىن ءىس-ارەكەت بەلگىلەرى بولماسا كوزدەلگەن جاۋاپكەرشىلىك تۋرالى ايتىپ بەردى.
«بۇل جاعدايدا جوعارىدا اتالعان لاۋازىمدى تۇلعالارعا 600 ايلىق ەسەپتىك كورسەتكىش نەمەسە 1,8 ملن تەڭگە كولەمىندە ايىپپۇل سالىنۋى مۇمكىن», دەدى و.بەكتەنوۆ.
ول قىلمىستىق جازالاناتىن ءىس-ارەكەت بەلگىلەرىنىڭ جوقتىعىن تۇسىندىرە وتىرىپ: «ەگەر الىنعان زاڭسىز سىياقى نەمەسە سىيلىق سوماسى 2 ايلىق ەسەپتىك كورسەتكىشتەن اسپاسا, ول بۇگىنگى كۇنى 5 834 تەڭگەنى قۇرايدى, الدىن الا ۋاعدالاستىق بولماسا نەمەسە سىياقىنى قورقىتىپ الماسا, وندا مۇنداي قۇقىق بۇزۋشىلىق قىلمىستىق جاۋاپتىلىققا اكەپ سوقپايدى جانە اكىمشىلىك تارتىپپەن جازالانادى», دەپ اتاپ ءوتتى.