قازاقستانعا شارم-ەل-شەيح پەن دۋبايدان اۋە رەيسىمەن كەلگەن 8 ادامنان كوروناۆيرۋستىڭ «بريتاندىق شتامى» تابىلدى, دەپ حابارلايدى Egemen.kz سانيتارلىق-ەپيدەميولوگيالىق باقىلاۋ كوميتەتى ۇلتتىق ساراپتاما ورتالىعىنىڭ ءباسپاسوز قىزمەتىنە سىلتەمە جاساپ.
«ورتالىقتىڭ نۇر-سۇلتان قالاسى بويىنشا مولەكۋليارلىق-گەنەتيكالىق زەرتتەۋلەر زەرتحاناسى تولىق گەنومدىق سەكۆەنيرلەۋ ادىسىمەن COVID-19 وڭ ناتيجەسى بار 265 ۇلگىنى زەرتتەدى. SARS-CoV-2 ۆيرۋسىنىڭ گەنەتيكالىق سيپاتتاماسىنا بۇل سىنامالار قازاقستان رەسپۋبليكاسىنىڭ 14 وڭىرىنەن الىندى. نۋكلەوتيدتەر تىزبەگىن تالداۋ ناتيجەسىندە ماماندار 12 ۆيرۋستان «بريتاندىق شتامم» گەنوتيپىن انىقتادى.
12 شتامنىڭ 8 جاعدايى شارم-ەل-شەيح (ەگيپەت) جانە دۋباي (بىرىككەن اراب امىرلىكتەرى) حالىقارالىق رەيستەرى ارقىلى كەلگەن ازاماتتاردان تابىلدى», دەلىنگەن حابارلامادا. ورتالىقتىڭ مالىمەتىنشە, قازىرگى ۋاقىتتا بۇل ەلدەردە SARS-CoV-2 كوروناۆيرۋسىنىڭ «بريتاندىق» جانە «وڭتۇستىكافريكالىق» شتامدارى كوپ بايقالۋدا.
«بريتاندىق شتامنىڭ» گەنوتيپى بار 4 ۆيرۋس نۇر-سۇلتان, الماتى قالالارىندا جانە اقتوبە وبلىسىندا تابىلدى. بۇل ۆيرۋس شەتەلدەن كەلگەن ازاماتتاردان تارالعان بولۋى مۇمكىن», دەلىنگەن حابارلامادا.