Qazindustry قازاقستاندىق يندۋستريا جانە ەكسپورت ورتالىعى وتاندىق جەڭىل ونەركاسىپتىڭ 2020 جىلعى قورىتىندىسىن جاريالادى. بىلتىر سالادا 128,7 ملرد تەڭگەنىڭ ءونىمى وندىرىلگەن. بۇل 2019 جىلعى دەڭگەيدەن 11 پايىزعا جوعارى.
جەڭىل ونەركاسىپتەگى نەگىزگى ۇلەس توقىما وندىرىسىنە تيەسىلى – 70,8 ملرد تەڭگە. ودان كەيىنگى ورىندا كيىم ءوندىرىسى تۇر – 46,3 ملرد تەڭگە. بىلعارى ءوندىرىسىنىڭ كولەمى – 11,6 ملرد تەڭگە.
ورتالىقتىڭ مالىمەتىنشە, بىلتىر سالاداعى ءونىمنىڭ ناقتى كولەم يندەكسى 115 پايىزدى قۇراعان. جەڭىل ونەركاسىپتىڭ بارلىق باعىتىندا ءوسىم تىركەلگەن. ماسەلەن, توقىما بۇيىمدارى ءوندىرىسىنىڭ ناقتى كولەم يندەكسى 104,5 پايىزعا تەڭ. بۇل باعىتتاعى ءوسىم ماقتادان جاسالعان ماتالار (+59 پايىز), حيميالىق نەمەسە شتاپەلدى تالشىقتاردان جاسالعان ماتالار (+61 پايىز), وزگە دە توقىما بۇيىمدار (+30 پايىز) ءوندىرىسى ەسەبىنەن قالىپتاسقان.
كيىم ءوندىرىسىنىڭ ناقتى كولەم يندەكسى 105,5 پايىزعا تەڭ. نەگىزىنەن وسىمگە ايەلدەردىڭ جۇمىس كيىمىنىڭ 2,4 ەسە ءوسۋى وڭ اسەر ەتكەن. بۇدان بولەك, وسىمگە وزگە دە جۇمىس كيىمدەرى (+72 پايىز), تەننيسكا, مايكا مەن شورتى, فۋفايكا جانە تريكوتاج بۇيىمدارى (+43 پايىز) دا ءوز ۇلەسىن قوستى.
بىلعارى ءوندىرىسىنىڭ ناقتى كولەم يندەكسى – 231,1 پايىز. وسىمگە سپورتتىق, تۇمسىعىندا مەتالل قورعانىشى بار, ءارتۇرلى ارنايى اياق كيىمدەر شىعارۋ وڭ اسەر بەرگەن. سونداي-اق جاقسى كورسەتكىش بىلعارىدان جاسالعان اياق كيىم ءوندىرىسىنىڭ 9 ەسە وسۋىنە بايلانىستى. بۇعان ءۇلبىر, يلەنگەن تەرىلەردىڭ ءوسىمىن (+15 پايىز) قوسىڭىز.
بىلتىر جەڭىل ونەركاسىپ ونىمدەرىنىڭ ەكسپورتى 2019 جىلمەن سالىستىرعاندا 23 پايىزعا قىسقارىپ, 131,9 ملن دوللاردى قۇرادى. ءبىزدىڭ ونىمدەر نەگىزىنەن رەسەي, قىتاي جانە لاتۆيا ەلدەرىنە ەكسپورتتالادى.
2020 جىلعى قاڭتار-قاراشادا جەڭىل ونەركاسىپ ونىمدەرىنىڭ يمپورتى 1 ملرد 562 ملن دوللارعا تەڭ بولعان. بۇل 2019 جىلدىڭ كورسەتكىشىنەن 2 پايىزعا تومەن. ەكسپورتتىق جانە يمپورتتىق جەتكىزىلىمنىڭ قىسقارۋى COVID-19 پاندەمياسىنا قاتىستى ەنگىزىلگەن كارانتيندىك شارالارعا بايلانىستى. ءبىز نەگىزىنەن قىتاي, رەسەي جانە تۇركيا ونىمدەرىن تۇتىنىپ وتىرمىز.
وتكەن جىلدىڭ 11 ايىندا ەلدەگى جەڭىل ونەركاسىپ نارىعىنىڭ كولەمى 1,7 ملرد دوللاردى قۇرادى. ونىڭ 8,4 پايىزى – وتاندىق تاۋار ءوندىرىسى. ال يمپورتتىق ءونىمنىڭ ۇلەسى – 91,6 پايىز.
جەڭىل ونەركاسىپ ەلىمىزدىڭ ءتورت وڭىرىندە – شىمكەنت جانە الماتى قالالارىندا, تۇركىستان جانە الماتى وبلىستارىندا جاقسى دامىعان. شىمكەنت رەسپۋبليكا ءوندىرىسىنىڭ 23 پايىزىن قامتاماسىز ەتىپ وتىر. تۇركىستان وبلىسىنىڭ ۇلەسى – 14,4 پايىز, الماتى وبلىسى – 13,2 پايىز, الماتى قالاسى –10 پايىز.