ەلوردا تۇرعىندارىن كوروناۆيرۋستىق ينفەكتسياعا قارسى ۆاكتسيناتسيالاۋ جالعاسۋدا. بۇگىندە ءبىرىنشى كومپونەنت بويىنشا 11 مىڭعا جۋىق ادام ۆاكتسيناتسيادان ءوتتى. بۇل تۋرالى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمالىم ەتتى, دەپ حابارلايدى قالا اكىمدىگىنىڭ رەسمي سايتى.
«ەكىنشى كومپونەنت ءۇش مىڭنان استام ادامعا سالىندى. ونىڭ ىشىندە مەديتسينالىق قىزمەتكەرلەر — 5 000-عا جۋىق, مۇعالىمدەر – 2 000-عا جۋىق, سوزىلمالى اۋرۋلارى بار ادامدار – 1 000-نان استام, قۇقىق قورعاۋ ورگاندارىنىڭ قىزمەتكەرلەرى – 1 200-دەن استام, باسقا توپتاعىلار – 2 000-عا جۋىق. ەكپە العاننان كەيىن دەنساۋلىقتىڭ قاتتى اسقىنۋ جاعدايلارى بولعان جوق», دەدى ۆەدومستۆو باسشىسى.
ونىڭ ايتۋىنشا 36 العاشقى مەديتسينالىق-سانيتارلىق كومەك كورسەتۋ ۇيىمدارىندا ءبىرىنشى جانە ەكىنشى كومپونەنتتەرگە ارنالعان 2 ۆاكتسيناتسيا بولمەلەرى, ۆاكتسيناتسيادان كەيىن پاتسيەنتتەردى باقىلاۋعا ارنالعان كۇتۋ بولمەلەرى تۇراقتى رەجيمدە جۇمىس ىستەيدى.
«بارلىق ەمحانالاردا توڭازىتقىش قوندىرعىلارى, ۆاكتسينالاردى قويمادان ەكپە سالۋ مەكەنىنە تاسىمالداۋعا ارنالعان تەرميالىق كونتەينەرلەر بار. ۆاكتسينالار بارلىق سانيتاريالىق-ەپيدەميولوگيالىق تالاپتارعا ساي ساقتالادى», دەدى تيمۋر مۇراتوۆ.
ايتا كەتەيىك, قالا تۇرعىندارىن ۆاكتسيناتسيالاۋ ءساۋىر ايىنىڭ ورتاسىنان باستالادى. ۆاكتسيناتسيا ەڭ الدىمەن ۇجىمدىق يممۋنيتەتكە جەتۋ ءۇشىن قاجەت. بۇل ينفەكتسيامەن كۇرەستە جاقسى ناتيجەگە جەتۋگە اسەر ەتەدى.