پەداگوگتەرگە العاش رەت «قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسى تابىستالدى

«پەداگوگتەرگە مەملەكەت تاراپىنان ەرەكشە كوڭىل ءبولىنىپ جاتىر. مەملەكەت باسشىسىنىڭ تاپسىرماسى بويىنشا العاش رەت "قازاقستاننىڭ ەڭبەك سىڭىرگەن ۇستازى" مەملەكەتتىك ناگراداسى تاعايىندالدى. ەڭبەكتەرىڭىز بەن وسكەلەڭ ۇرپاقتى تاربيەلەۋگە قوسقان ۇلەستەرىڭىز ءۇشىن العىس ايتامىن. ناگرادالارىڭىز قۇتتى بولسىن! سىزدەرگە مىقتى دەنساۋلىق, وتباسىلارىڭىزعا اماندىق, باق-بەرەكە تىلەيمىن», دەدى مينيستر اسحات ايماعامبەتوۆ.

سونداي-اق ءبىلىم جانە عىلىم ءمينيسترى سوڭعى جىلدارى ەنگىزىلگەن وڭ وزگەرىستەرگە توقتالىپ ءوتتى. ماسەلەن, جالاقىنىڭ ءوسۋى, ەسەپتىلىك پەن پەداگوگيكالىق جۇكتەمەنىڭ تومەندەۋى, وقۋلىقتار مەن وقۋ باعدارلامالارىن ازىرلەۋگە قويىلاتىن تالاپتاردىڭ كۇشەيۋى, مەكتەپ ديرەكتورلارىن تاعايىنداۋ جانە پەداگوگتەردى جۇمىسقا قابىلداۋ قاعيدالارىنىڭ وزگەرۋى, پەداگوگ ماماندىعى بويىنشا وقۋعا تۇسۋگە قاجەت شەكتى ۇپايدىڭ ارتۋى, بولاشاق مۇعالىمدەردىڭ اي سايىنعى ستيپەندياسىنىڭ جوعارىلاۋى تۋرالى دا ايتىلدى.

«قازاقستاننىڭ ەڭبەك سىڭىرگەن ۇستازى» مەملەكەتتىك ناگراداسى مۇعالىمدەرگە ۇزدىك جەتىستىكتەرى مەن مەملەكەت الدىنداعى ەرەكشە ەڭبەگى ءۇشىن بەرىلەدى. جوعارى اتاققا يە بولعان پەداگوگ 1 000 اەك مولشەرىندە بىرجولعى تولەم الادى.

ەڭبەك ارداگەرى, ۇلاعاتتى ۇستاز ورىنشا قارابالينا بۇگىنگى تاڭدا پەداگوگ مارتەبەسى زاڭمەن بەكىتىلگەنىن, ەندىگى كەزەكتە بارلىعى مۇعالىمدەردىڭ وزدەرىنە بايلانىستى ەكەنىن اتاپ ءوتتى.

«قازاق حالقى اعارتۋشىلار مەن ۇستازداردى تورگە وتىرعىزساق دەگەن ەدى. سول يدەيا بۇگىنگى تاڭدا ىسكە استى. قازىر ءبىز توردە وتىرمىز. مۇعالىمدەردى قوعام دا مويىندادى. اتا-انا دا, وقۋشى دا مۇعالىمدەرسىز ءتالىم-تاربيە الا المايتىنىن ءتۇسىندى. مۇعالىمدەرگە بارلىق جاعداي جاسالىپ وتىر. ەندى مۇعالىمدەردىڭ وزىنە بايلانىستى. سوندىقتان ايتارىم, ۇستاز وسى اتاققا لايىق بولۋ كەرەك. ول ءۇشىن مۇعالىمنىڭ ءجۇرىس-تۇرىسى دا, كيگەن كيىمى دە, سويلەگەن ءسوزى دە ونەگە تۇتارلىقتاي بولۋ كەرەك. مۇعالىم سونداي دارەجەگە جەتسە عانا وقۋشىلاردىڭ جۇرەگىنەن ورىن الادى», دەدى قازاقستاننىڭ ەڭبەك سىڭىرگەن ۇستازى ورىنشا قارابالينا.

«قازاقستاننىڭ ەڭبەك سىڭىرگەن ۇستازى» قۇرمەتتى اتاعىن العاندارلىڭ اراسىندا الماتى وبلىسى № 1 مەكتەپ-گيمنازياسىنىڭ حيميا جانە بيولوگيا ءپانىنىڭ مۇعالىمى تاتيانا ميحايلوۆنا ستانكەۆيچ بار. ول 35 جىل وقۋشىلارعا ءبىلىم بەرگەن. ۇستاز شاكىرتتەرىنە ەكولوگيالىق مادەنيەتتى ۇيرەتىپ, جاس ەرىكتىلەردى تاربيەلەگەن. تاتيانا ستانكەۆيچ كوپتەگەن رەسپۋبليكالىق جانە حالىقارالىق بايقاۋلاردىڭ جەڭىمپازى جانە 2013 جىلى «ۇزدىك پەداگوگ» اتانعان.  

«بۇگىن ۇستازدار ءۇشىن ايتۋلى كۇن. بۇل ەلىمىزدەگى مۇعالىمدەردىڭ اتقارعان جۇمىسىنا بەرىلگەن جوعارى باعا. وقۋشىنىڭ قولىنا العاش رەت قالام ۇستاتىپ, ءارىپ تانىتقان, ءبىلىم بەرگەن مۇعالىمدەردىڭ زور ەڭبەگىنە كورسەتىلگەن قۇرمەت ءۇشىن العىسىم شەكسىز», دەدى قازاقستاننىڭ ەڭبەك سىڭىرگەن ۇستازى تاتيانا ستانكەۆيچ.

مەملەكەتتىك ناگراداعا پەتروپاۆل قالاسىنىڭ م. ايتحوجين اتىنداعى № 1 مەكتەپ ديرەكتورى الەكساندر يۋرەۆيچ كۋرلەنيا دا يە بولدى. بۇل  ماراپاتتى 40 جىلدان استام ەڭبەك ءوتىلى بار بىلىكتى باسشى بۇكىل مەكتەپ ۇجىمىنىڭ ەڭبەگى دەپ سانايدى.

«وسىنداي قۇرمەتكە بولەنگەنىم ءۇشىن وتە قۋانىشتىمىن. ءبىزدىڭ مەكتەبىمىزدىڭ بوي كوتەرگەنىنە بيىل 100 جىل. بۇل مەملەكەتتىك ماراپاتتى ۇجىمداعى ءاربىر پەداگوگتىڭ اتقارىپ جاتقان ەڭبەگىنە بەرىلگەن جوعارى باعا دەپ بىلەمىن. مەملەكەت مۇعالىمدەرگە مورالدىق جانە ماتەريالدىق جاعىنان دا قولداۋ كورسەتىپ كەلەدى», دەدى قازاقستاننىڭ ەڭبەك سىڭىرگەن ۇستازى الەكساندر كۋرلەنيا.