باتىس قازاقستان وبلىسى سوڭعى جىلدارى قۋاڭشىلىقتان قاتتى زارداپ شەگۋدە. وڭىردەگى وزەن-كولدەر سۋالىپ, ءتورت ت ۇلىك مال ىشەرگە سۋ تاپپاي قالعانىن بىرنەشە مارتە جازعان بولاتىنبىز.
سۋ تاپشىلىعى بۇرىن دا, كەڭەس وكىمەتى كەزىندە دە بولعان. سوندىقتان بايىرعى جۇرت ونىڭ دا امالىن تاپقان. اسىرەسە سوۆەت كەزىندەگى شارۋاشىلىق باسشىلارى ءداستۇرلى داعدىعا سۇيەنىپ, قىسقى قار, كوكتەمگى سەل سۋىن بارىنشا مول جيناپ الۋعا تىرىساتىن. تابيعي جەر بەدەرىن ەسكەرىپ, قار سۋى جينالاتىن جەرلەردى ودان سايىن تەرەڭدەتىپ, سۋ قويمالارى – قاۋىزدار قازىلدى. وعان جينالعان سۋ كۇزگە دەيىن ءتورت ت ۇلىكتىڭ ءشولىن قاندىرۋعا جەتەتىن.
- سوڭعى ەكى جىلدا وبلىسىمىزدىڭ وڭتۇستىك اۋداندارى قۋاڭشىلىق پەن سۋ تاپشىلىعىن كورىپ وتىر. بيىل دا مۇنداي جاعداي قايتالانباۋى ءۇشىن تاجىريبەلى ماماندارمەن, ارىپتەستەرىمىزبەن اقىلداسىپ, اۋىل شارۋاشىلىعىنا قاتىستى باستى ماسەلەنىڭ شەشىمىن تابۋعا تىرىستىق. اسىرەسە مالعا قاجەتتى سۋ تاپشىلىعىن شەشۋ ءۇشىن اۋدانداعى ەلدى مەكەندەر ماڭىندا بۇرىن بولعان سۋ بوگەتتەرىن تازالاۋ, سۋ ارنالارىن قازۋ ءىسىن قولعا الدىق. بۇل باستاما ناتيجەلى بولدى دەپ ايتا الامىز. قازىردىڭ وزىندە بارلىق سۋ قويمالارىنا قار سۋى مول جينالدى, - دەيدى قازتالوۆ اۋدانىنىڭ اكىمى البەرت ەساليەۆ.
ارينە, سۋ ارنالارىن قازۋ, قاۋىزداردىڭ تابانىن تازارتۋ, تەرەڭدەتۋ وڭاي جۇمىس ەمەس. وعان ارناۋلى جوبا, ءتيىستى تەحنيكا كەرەك. سوندىقتان وتكەن جىلى كازتالوۆ اۋدانىندا سۋ قويمالارىن تازارتۋ, كانالدار قازۋ, تەحنيكالىق سۋ ايداۋ, تەحنيكالىق سۋمەن قامتۋ جۇمىستارىنىڭ جوباسىن جاساۋعا اۋداندىق بيۋدجەتتەن 66,45 ملن تەڭگە قاراجات بولىنگەن. بۇل باستامانى باتىس قازاقستان وبلىسىنىڭ اكىمى عالي ەسقاليەۆ تا قولداپ, اۋدانعا ارنايى تەحنيكا الىنىپتى.
وسىلايشا اۋداندىق كوممۋنالدىق كاسىپورنى سۋ جاڭا ەكسكوۆاتور مەن بۋلدوزەر تراكتورلى بولىپ قالدى. بۇرىن اۋدان اۋماعىنداعى بوگەتتەر مەن ارنالاردى تازارتۋ ءۇشىن تەحنيكاسى بار مەكەمەلەرگە تاپسىرىس بەرىپ, ءبىراز قاراجات شىعىندالاتىن ەدى. ەندى اۋدان ەشكىمگە جالىنباي, سۋ جۇيەلەرىن ءوزى جوندەۋگە كىرىستى. ءسويتىپ, بىلتىر قارا كۇزگە دەيىن اۋدانعا قاراستى 11 ەلدىمەكەندەگى 12 بوگەت تازارتىلىپ, 40 شاقىرىمعا جۋىق فۋرمانوۆ-قوسوبا, اششىساي-قاراسۋ ارنالارى قازىلدى. ەتكەن بەينەت, توگىلگەن تەر ەش بولماي, قازىردىڭ وزىندە سۋ قويمالارى تازا سۋعا تولىپ تۇرعانىن قاپزتالوۆتىق ارىپتەسىم قايرات جاقىپ قۋانا حابارلاپ جاتىر.
سۋ قويماسى تازالانىپ, قاۋىزى تولعان ەلدىمەكەندەر قاتارىندا بىرىك, قوشانكول, قاراوبا اۋىلدىق وكرۋگتەرى بار. اسىرەسە قاراوبا اۋىلى تۇرعىندارى ءبىراز جىلدان بەرى مال سۋىنىڭ تاپشىلىعىن جيىن سايىن كوتەرىپ جۇرەتىن. وتكەن كۇزدە اۋىل ماڭىنداعى ەكى بوگەت تە تەرەڭدەتىلىپ, تابانى ارشىلدى. بيىل سول بوگەتتەردە قار سۋى جينالىپ, ارناسىنان اسىپ جاتىر ەكەن.
- بىلتىر قاراوبا اۋىلىنداعى بوگەتتەردى تازارتۋ ءۇشىن اۋداندىق بيۋدجەتتەن قوماقتى قاراجات ءبولىندى. كۇزدە قوس بوگەتىمىز تازارتىلىپ, تەرەڭدەتىلدى. مىنە, دەر كەزىندە تازارتىلعان بوگەتتەرگە سۋ تولىپ تۇر. اۋىل تۇرعىندارى ءدان ريزا. وسى جۇمىستى دۇرىس جوسپارلاپ, جۇزەگە اسىرعان بارلىق ازاماتتارعا ەل اتىنان العىس ايتامىن! – دەيدى «اقبوتا» شارۋا قوجالىعىنىڭ جەتەكشىسى, قازتالوۆ اۋداندىق ءماسليحاتىنىڭ دەپۋتاتى قۋانىش ەرمەكوۆ.
باتىس قازاقستان