قوستاناي وبلىسىندا الداعى سۋ تاسقىنىنا دايىندىق ءجۇرىپ جاتىر

اعىمداعى جىلعى 3 ناۋرىزدان باستاپ ازاماتتىق قورعاۋدىڭ مەملەكەتتىك جۇيەسىنىڭ وبلىستىق اۋماقتىق كىشى جۇيەسى كۇندەلىكتى قىزمەت رەجيمىنەن ەرەكشە وكىمگە دەيىن جوعارى دايىندىق رەجيمىنە اۋىستىرىلدى (وبلىس اكىمىنىڭ 2021 جىلعى 2 ناۋرىزداعى № 35-ءو وكىمى). سۋ تاسقىنى جاعدايىن باقىلاۋ, باسقارۋ ورگاندارىنىڭ ءىس-قيمىلىن ۇيلەستىرۋ ءۇشىن دەپارتامەنت بازاسىندا مۇددەلى ازاماتتىق قورعاۋ قىزمەتتەرىن تارتا وتىرا, وبلىستىق سۋ تاسقىنىنا قارسى شتاب ورىستەتىلەتىن بولادى.

اعىمداعى جىلدىڭ اقپان ايىندا توتەنشە جاعدايلاردى الدىن الۋ جانە جويۋ بويىنشا وبلىستىق كوميسسيانىڭ وتىرىسى وتكىزىلدى, وندا قالالار مەن اۋدانداردىڭ اكىمدەرىنە, مەكەمەلەر مەن ۇيىمداردىڭ باسشىلارىنا سۋ تاسقىنى كەزەڭىندە سۋ شارۋاشىلىعى قۇرىلىستارىنىڭ بوگەتتەرى مەن توعاندارىنىڭ جاي-كۇيىنە كوميسسيالىق تەكسەرۋ ۇيىمداستىرۋ, سۋ وتكىزۋ قۇرىلىستارىن, اۆتوموبيل جولدارىن, عيماراتتار مەن قۇرىلىستاردىڭ شاتىرلارىن قاردان تازارتۋ بويىنشا ءىس-شارالاردى جۇرگىزۋ قاجەتتىلىگى تۋرالى ۇسىنىمدار بەرىلدى. سونداي-اق, سۋ تاسقىنى كەزەڭىندە گيدروتەحنيكالىق قۇرىلىستارى بار سۋ قويمالارىندا, سونداي-اق توعاندار مەن بوگەتتەردە تاۋلىك بويى كەزەكشىلىك ەتەتىن باقىلاۋ بەكەتتەرى قويىلادى.

وسى ءىس-شارالاردى ورىنداۋ شەڭبەرىندە تاۋارلار مەن قىزمەتتەردى مەملەكەتتىك ساتىپ الۋ بويىنشا كونكۋرستار وتكىزىلدى. جەتكىزۋشىلەرمەن شارتتار جاسالدى, بۇل سۋ تاسقىنى جاعدايىنا اۋە بارلاۋىن جۇرگىزۋگە دايىندىقتى قامتاماسىز ەتەدى. ءوڭىردىڭ سۋ ايدىندارىندا مۇزدى قوپسىتۋ بويىنشا جارىلىس جۇمىستارى جۇرگىزىلۋدە.

تابيعي جانە تەحنوگەندىك سيپاتتاعى توتەنشە جاعدايلاردى ەرتە انىقتاۋدىڭ عارىشتىق مونيتورينگى تەحنولوگيالارىن پايدالانۋ ماقساتىندا «قازاقستان عارىش ساپارى» ۇك اق شارت جاسالدى. قازىرگى ۋاقىتتا الداعى سۋ تاسقىنى بويىنشا اقپارات قوستاناي وبلىسىنىڭ توتەنشە جاعدايلار دەپارتامەنتىنە جانە باسقا دا مۇددەلى مەكەمەلەر مەن ۆەدومستۆولارعا كۇن سايىن كەلىپ تۇسەدى.

سۋ تاسقىنىنا قارسى ءىس-شارالاردى جۇرگىزۋ بارىسىندا قالالار مەن اۋدان ورتالىقتارىنىڭ اۋماعىنان 1 ملن. 100 مىڭ تەكشە مەتردەن استام قار شىعارىلدى. وسى باعىتتاعى جۇمىستار جالعاسۋدا. وبلىس وزەندەرىنىڭ دەڭگەيى مەن قاردىڭ ەرۋىنە تۇراقتى باقىلاۋ جۇرگىزىلەدى. جوعارعى-توبىل, قاراتومار, جەلقۋار, جوعارعى شورتاندى سۋ قويمالارىنىڭ تولىمدىلىعى جانە ولاردىڭ تولىپ كەتۋىنىڭ الدىن الۋ جانە بوگەتتەردىڭ بۇزىلۋ قاۋپىن تۋدىرۋ ماقساتىندا تاسقىن سۋلاردى ۋاقتىلى اعىزۋ بويىنشا شارالار قابىلداۋ ەرەكشە باقىلاۋعا الىندى.

كوكتەمگى سۋ تاسقىنى كەزەڭىندە قوستاناي وبلىسىنىڭ اۋماعىندا تاۋلىك بويى كەزەكشىلىگى بار 26 گيدروبەكەتتىڭ جۇمىسى ۇيىمداستىرىلادى.

سۋ تاسقىنى جاعدايى اسقىنعان جاعدايدا اۆاريالىق-قۇتقارۋ جانە كەزەك كۇتتىرمەيتىن جۇمىستاردى جۇرگىزۋ ءۇشىن 2 960 ادام,1 085 بىرلىك تەحنيكا كۇشى مەن قۇرالدارى دايىندالدى.