نۇر-سۇلتان قالاسى ەپيدەميولوگيالىق جاعدايدى باعالاۋ ماتريتساسى بويىنشا 17 كۇننەن بەرى «قىزىل ايماقتا» تۇر. كۇنىنە 150-دەن 280-گە دەيىن جاعداي تىركەلەدى. بۇل تۋرالى قالانىڭ باس مەملەكەتتىك سانيتارلىق دارىگەرى سارحات بەيسەنوۆا مالىمدەدى, دەپ حابارلايدى ەلوردا اكىمدىگىنىڭ رەسمي سايتى.
«قالا 17 كۇننەن بەرى ەپيدەميولوگيالىق جاعدايدى باعالاۋ ماتريتساسى بويىنشا «قىزىل ايماقتا» ورنالاسقان. كۇنىنە 150-دەن 280-گە دەيىن جاعداي تىركەلەدى. سوڭعى اپتادا سىرقاتتانۋشىلىق دەڭگەيى الدىڭعى اپتادان 21%-عا جوعارى, 100 مىڭ تۇرعىنعا شاققانداعى قارقىندى كورسەتكىش — 129,6 قۇرادى. رەپرودۋكتيۆتى سانى — 0,99», دەدى بەيسەنوۆا.
سانيتارلىق دارىگەردىڭ مالىمەتىنشە, 2021 جىلدىڭ باسىنان بەرى قالا بويىنشا سىرقاتتانعاندار سانى 10 مىڭنان استى, پاندەميا باستالعالى 28 756 جاعداي تىركەلدى (ونىڭ ىشىندە 18 285 — سيمپتوماتيكالىق جانە 10471 — سيمپتومسىز).
اقپان ايىندا سىرقاتتانۋشىلىق ديناميكاسى قاڭتارمەن سالىستىرعاندا 25%-عا تومەندەگەنى بايقالدى. الايدا, سوڭعى التى ايداعى ەڭ جوعارى كورسەتكىش — قاڭتار ايىندا ورىن العان جوعارى دەڭگەيدىڭ قايتالانىپ وتىرعانى بايقالادى.
«وسى مەرەكەلىك اپتادا ناۋقاستارمەن بايلانىستا بولعاندار سانى 10%-عا ءوستى, ياعني 500-دەن 735 ادامعا دەيىن, بۇل قالا تۇرعىندارىنىڭ كارانتيندىك شارالاردى, ونىڭ ىشىندە ءۇي كارانتين رەجيمىن ساقتاماعانىن كورسەتەدى. سونىمەن قاتار, وتكەن اپتامەن سالىستىرعاندا بالالار اراسىندا اۋرۋدىڭ 5%-عا, ياعني 210-نان 339-عا دەيىن ءوسۋى بايقالادى», دەپ اتاپ ءوتتى ەلوردانىڭ باس سانيتارلىق دارىگەرى.
قازىرگى ۋاقىتتا بەلسەندى وشاقتار سانى – 1 512, ونىڭ ىشىندە: ءۇي – 976, ۇيىمداستىرىلعان – 536, وندا 3361 بايلانىستا بولعان ادام مەديتسينالىق باقىلاۋدا.
ەلوردادا قالىپتاسقان ەپيدەميولوگيالىق جاعدايعا بايلانىستى قالا تۇرعىندارى مەن قوناقتارى كارانتيندىك شەكتەۋلەر مەن سانيتارلىق نورمالاردى قاتاڭ ساقتاۋى كەرەك.