كادرلىق وزگەرىستەرگە بايلانىستى اقپارات جانە قوعامدىق دامۋ ءمينيسترىنىڭ بۇيرىعىمەن تيمۋر جۇمىرباەۆ «Adaldyq alany» جوباسىنىڭ جەتەكشىسى - قازاقستان رەسپۋبليكاسى اقپارات جانە قوعامدىق دامۋ ءمينيسترىنىڭ سىبايلاس جەمقورلىققا قارسى ءىس-قيمىل جونىندەگى شتاتتان تىس كەڭەسشىسى بولىپ تاعايىندالدى. «Adaldyq alany» جوباسىنىڭ كۋراتورى رەتىندە قر اقپارات جانە قوعامدىق دامۋ مينيسترلىگى اپپاراتىنىڭ باسشىسى سەرىك ەگىزباەۆ بەلگىلەندى, دەپ حابارلايدى Egemen.kz.
ەستەرىڭىزگە سالا كەتەيىك, ەلباسىنىڭ باستاماسىمەن سىبايلاس جەمقورلىققا قارسى جوبالىق كەڭسەلەر بۇكىل ەل بويىنشا اشىلىپ, جۇمىس ىستەپ جاتىر.
بۇگىندە قر اقدم-نىڭ «Adaldyq alany» جوباسى مەملەكەت پەن قوعامنىڭ سىبايلاس جەمقورلىققا قارسى كۇش-جىگەرىن بىرىكتىرەتىن بىرەگەي پلاتفورما رەتىندە قىزمەت ەتىپ تۇر.
قر اقدم سەنىم تەلەفونى - بۇل «Adaldyq alany» جوبالىق كەڭسە جەتەكشىسىنىڭ, اقپارات جانە قوعامدىق دامۋ ءمينيسترىنىڭ سىبايلاس جەمقورلىققا قارسى ءىس-قيمىل جونىندەگى شتاتتان تىس كەڭەسشىسى تيمۋر جۇمىرباەۆتىڭ جەكە بايلانىس ءنومىرى: +7 777 051 6694. «Adaldyq alany» جوبالىق كەڭسەسىنىڭ ەلەكتروندىق ادرەسى: adaldyqaqdm@qogam.gov.kz
تيمۋر جۇمىرباەۆ 1998 جىلى 9 قىركۇيەكتە قاراعاندى وبلىسى, جەزقازعان قالاسىندا دۇنيەگە كەلگەن.
ول وقۋدى پەكيننىڭ ساياسات جانە قۇقىقتانۋ كوللەدجىن (قىتاي) حالىقارالىق ەكونوميكالىق قۇقىق ماماندىعى بويىنشا ءبىتىردى.
قازىر لەۆ گۋميلەۆ اتىنداعى ەۇۋ-ءدىڭ حالىقارالىق قاتىناستار فاكۋلتەتىنىڭ شىعىستانۋ باكالاۆرىنا وقىپ جاتىر.
قازاقستان حالقى اسسامبلەياسىنداعى «جاراسىم» رەسپۋبليكالىق جاستار ۇيىمىنىڭ جەتەكشىسى.
«جەزقازعان. تاريحتاعى تۇلعالار» كىتابىنىڭ اۆتورى. تيمۋر جۇمىرباەۆ 2016 جىلى قاراعاندى وبلىسى بويىنشا قازاقستان حالقى اسسامبلەياسىنىڭ «شاڭىراق» جاستار ۇيىمىن باسقاردى. 2018 جىلى «جاڭعىرۋ جولى» قحا رەسپۋبليكالىق جاستار قوزعالىسى توراعاسىنىڭ ورىنباسارى بولىپ سايلاندى.