باسقا وڭىرلەردىڭ تىرشىلىگىندە قانداي دا ءبىر ماسەلە تۋىنداسا, بيلىكتىڭ قۇلاعىنا جەتپەي جاتقان شىعار دەپ ويلاۋىمىز كادىك. بىراق كۇللى ەلدىڭ نازارىنداعى ەلوردادا دا ءتۇيىنى شەشىلمەي جاتقان ماسەلەلەر بارشىلىق. سونىڭ ءبىرى – ۇلەستىك قۇرىلىس پروبلەماسى. نۇر-سۇلتان قالاسىندا ون جىلدان بەرى اياقتالماي جاتقان تۇرعىن ۇيلەر بار.
ەلوردانىڭ العاشقى قاداسى قاعىلىپ, اكىمشىلىك نىساندار بوي كوتەرە باستاعان كەزدە باس قالادا جاپپاي تۇرعىن ۇيلەر دە سالىنا باستادى. العاشىندا قۇرىلىس جۇمىستارى قىزۋ ءجۇردى. تۇرعىن ۇيلەر سالۋ توقتاعان جوق. بىراق كەيىن داعدارىستى جاعدايلارعا بايلانىستى سالا باياۋلاي باستادى. اقشاعا قۇنىعىپ, ازاماتتاردىڭ تىرنەكتەپ جيناعان اقشاسىن الدىن الا الىپ العان كومپانيالار تىعىرىققا تىرەلدى. ەكى ورتادا ەل ازاماتتارى ءۇيسىز قالدى. سوڭىندا مەملەكەتتىڭ كومەگىمەن ءبىراز قۇرىلىس اياقتالدى. بىراق بۇل جاعداي دا جۇرتشىلىققا ساباق بولا قويعان جوق. كۇرمەۋلى قۇرىلىسقا اقشا سالماڭدار دەگەنگە قۇلاق اسپاعاندار تاعى دا وسى قيىندىققا تاپ بولدى. كەيىن قۇرىلىسى اياقتالماي, ۇزاققا سوزىلعان كەشەندەردى قالالىق اكىمدىك قولىنا الدى. بۇگىندە ەلوردادا ون جىلدان بەرى قۇرىلىسى بىتپەي جاتقان تۇرعىن ۇيلەر بار.
ايتالىق, «جەتى جول» تۇرعىن ءۇي كەشەنىنىڭ سالىنىپ بولماي جاتقانىنا ون جىل تولدى. مۇنداعى ۇلەسكەر سانى – 600-گە جۋىق. قالا اكىمدىگىنىڭ رەسمي سايتىنداعى مالىمەتكە سۇيەنسەك, بۇل ءۇيدىڭ ينجەنەرلىك جەلىلەرىنە جوبالاۋ-سمەتالىق قۇجاتتامانى تۇزەتۋ بويىنشا جۇمىستار جۇرگىزىلگەن. تەرەزەلەردى ورناتۋ, ينجەنەرلىك جەلىلەرگە قوسۋ سىندى جۇمىستار جالعاسىپ جاتىر.
«ساقالدى قۇرىلىسقا» اينالعان تاعى ءبىر كەشەندەر − «زەرە-1» جانە «اقەركە-2». العاشقىسىندا 200-گە جۋىق ۇلەسكەر بار. ءبىرىنشى كەزەكتە ۇيگە دە, ينجەنەرلىك جەلىلەرگە دە بارلىق جوبالاۋ-سمەتالىق قۇجاتتاما دايىندالعان. العاشىندا مۇندا ءۇيدىڭ قاڭقاسى عانا بولعان. ەندى تۇرعىن ءۇي كەشەنىنىڭ قاسبەتى جوندەلگەن, تەرەزەلەرى, ەسىكتەرى, ءليفتىسى ورناتىلعان. سونىمەن قاتار ىشكى جانە سىرتقى ارلەۋ جۇمىستارى جۇرگىزىلىپ, سۋعا, ەلەكتر ەنەرگياسىنا, جىلۋعا جانە كارىزگە قوسىلعان ەكەن.
«اقەركە-2» تۇرعىن ءۇي كەشەنىنىڭ تۇرعىندارى دا جەتى جىلدان بەرى ءۇيىن كۇتىپ ءجۇر. كەشەننىڭ قاڭقاسى اياقتالىپ, تەرەزەلەرى مەن ەسىكتەرى سالىنىپتى.
نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا قۇرىلىسى ۇزاققا سوزىلعان تۇرعىن ءۇي كەشەندەرىندە ءجۇرىپ جاتقان جۇمىس جونىندە ايتا كەلىپ, «جەتى جول», «زەرە-1», «اقەركە-2» تۇرعىن ءۇي كەشەندەرىنە بارعانىن, پاندەمياعا قاراماستان, قۇرىلىستى توقتاتپاس ءۇشىن قولدان كەلگەن مۇمكىندىكتەر جاسالعانىن جەتكىزدى. جوعارىدا اتالعان ۇيلەر وسى جىلى پايدالانۋعا بەرىلمەك.
جاقىندا قالا اكىمدىگى قۇرىلىسى كوپكە سوزىلعان, تالاي ادام ۇزدىگىپ كۇتىپ جۇرگەن «شىعىس» تۇرعىن ءۇي كەشەنىندە دە ۇلكەن سەڭ قوزعالعانىن ايتىپ, تۇرعىنداردى قۋانتىپ قويدى. بۇل كوپ قاباتتى تۇرعىن ءۇي كەشەنى بىرنەشە بلوكتان تۇرادى. ۇلەسكەرلەردىڭ جالپى سانى 2 مىڭنان اسادى. اكىمنىڭ ايتۋىنشا, بارلىق بلوكقا قارجى بولىنگەن تەحنيكالىق اۋديت جۇرگىزىلگەن, مەردىگەرلەرى دە انىقتالعان.
جالپى سوڭعى 1,5 جىلدىڭ ىشىندە ەلوردادا قۇرىلىسى ۇزاققا سوزىلعان نىسانداردىڭ سانى ەكى ەسە قىسقارىپتى. ۇزاققا سوزىلعان ءاربىر قۇرىلىستىڭ تۇرعىندارى بۇگىندە ءۇيىن سارىلا كۇتىپ ءجۇر. كوبى قازىر جۇرەكسىنىپ قالعان. ء«بىر كۇنى قۇرىلىس جۇمىسى توقتاپ قالاما دەپ قورقامىز» دەيدى. ويتكەنى سالىنىپ جاتقان ءار ءۇيدىڭ ارتىندا ءبىر وتباسىنىڭ تاعدىرى تۇر. قۇرىلىسى ۇزاققا سوزىلعان ۇيلەردىڭ تۇرعىندارى سول كەزدەگى ءسابيىمىز بۇگىندە ۇلكەن ازامات بولدى, ءتىپتى نەمەرە سۇيدىك دەپ وتىر. ءتىپتى كوپتەن كۇتكەن ءۇيىن كورە الماي, ومىردەن وزعاندار دا بار...
نۇر-سۇلتان