كوروناۆيرۋس ينفەكتسياسىنىڭ ءۇشىنشى تولقىنى الەمدى ابىگەرگە سالىپ جاتقان تۇستا ەۋروكوميسسيا بۇل جاعدايدان شىعار جالعىز جول – جاپپاي ۆاكتسينالاۋ دەگەن پىكىردى ۇستانۋدا. ىندەت قاۋپى جونىنەن «قىزىل ايماق» قاتارىنان شىقپاي تۇرعان باتىس قازاقستان وبلىسىندا ەكپە الۋ قالاي ءجۇرىپ جاتىر؟
«وڭىردە ۆاكتسينالاۋ ءىسى 1 اقپاندا باستالدى. قازاقستان رەسپۋبليكاسى باس سانيتار دارىگەرىنىڭ قاۋلىسىنا سايكەس, ەكپەنىڭ ەكىنشى بولىگىن الۋ العاشقى ۆاكتسينادان سوڭ ءۇش اپتادان كەيىن جۇرگىزىلەدى. ناۋرىزدىڭ 3-ءى كۇنگى مالىمەت بويىنشا, باتىس قازاقستان وبلىسىندا 1 مىڭ مەديتسينا قىزمەتكەرى «گام-كوۆيد-ۆاك» (سپۋتنيك V) ۆاكتسيناسىنىڭ ءى جانە ءىى كومپونەنتىن الدى» دەيدى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى.
ناۋرىزدىڭ 4-ءى كۇنى وبلىسقا «گام-كوۆيد-ۆاك» ۆاكتسيناسىنىڭ 5 500 دوزاسى كەلگەن ەدى. مۇنىڭ 3 250-ءى – ءبىرىنشى, 2 250 داناسى – ەكىنشى كەزەڭدە ەگۋگە ارنالعان. ارينە, ەكپە ەڭ الدىمەن كوروناۆيرۋس جۇقتىرۋ قاۋپى جوعارى مەديتسينا قىزمەتكەرلەرىنە, ودان سوڭ پەداگوگتەر مەن كۇشتىك قۇرىلىمدار وكىلدەرىنە جاسالۋدا. بۇل جۇمىس كۇن سايىن كەستە بويىنشا باقىلانىپ, مونيتورينگ جاسالىپ وتىر.
19 ناۋرىزدا ۆاكتسينانىڭ ءى كەزەڭىندە ەگىلەتىن تاعى 1 مىڭ دانا ەكپە وبلىسقا كەلدى. ناۋرىزدىڭ 25-ىندەگى مالىمەتكە قاراعاندا, وڭىردە 3 255 ادام ۆاكتسينا قابىلداپ ۇلگەرگەن. ولاردىڭ اراسىندا 768 پەداگوگ, 199 اسكەري قىزمەتشى بار.
ەكپە جۇمىسى قالاي جۇرەدى؟ اۋەلى دەنساۋلىق ساقتاۋ باسقارماسى ءتۇرلى مەكەمە-ۇيىمدارعا: ءبىلىم باسقارماسىنا, كۇشتىك قۇرىلىم باسشىلارىنا حات جولداپ, ەكپە الاتىن ازاماتتاردىڭ ءتىزىمىن الدىرادى. ول ءتىزىم جەدەل تۇردە ەكپەگە شاقىرتۋ ءۇشىن جەرگىلىكتى ەمحانالارعا جىبەرىلەدى. بۇعان قوسا, باسقارما كۇن سايىن ەكپەنىڭ بارىسىن باقىلاپ, ءتىزىمدى تەكسەرىپ وتىرادى.
بۇگىندە وبلىستا COVID-19 ىندەتىنە قارسى ۆاكتسينا جاسايتىن 28 كابينەت جاساقتالعان. ونىڭ 7-ەۋى – قالالىق مەملەكەتتىك ەمحانالاردا ورنالاسسا, بەسەۋى «مەديتسينالىق ورتالىق», «مەديكەر اقساي», «باتىس اۆيگيپ», Uniserv Medical Center جانە INTERTEACH سەكىلدى جەكەمەنشىك ورتالىقتار. بۇعان قوسا 15 اۋداندىق اۋرۋحانا مەن تايپاق اۋىلدىق اۋرۋحانا بازاسىندا دا ەكپە جۇمىسى ءجۇرىپ جاتىر.
ەكپە جۇمىسى ەرىكتى تۇردە جۇرگىزىلەدى. پاتسيەنت العاشقى ۆاكتسينانى الاردا مىندەتتى تۇردە دارىگەر قاراۋىنان ءوتىپ, قىزۋى ولشەنەدى, ەپيدەميالىق انامنەز الىنادى. دەنە قىزۋى 37-دەن جوعارى بولسا, ەكپە جاسالمايدى. ەكپەدەن كەيىنگى 30 مينۋت جانە يممۋنداۋدان سوڭعى 3 تاۋلىك بويى ۆاكتسينا العان ادام دارىگەردىڭ باقىلاۋىندا بولادى. جوعارىدا ايتىلعان ەكپە كابينەتتەرى ۆاكتسينادان كەيىن بولاتىن ىقتيمال اسقىنۋ كەزىندە قاجەت بولاتىن بارلىق قۇرال-جابدىقپەن, پرەپاراتتارمەن قامتىلعان.
باتىس قازاقستان وبلىسى