ادامزاتتىق وركەنيەتتىڭ التىن بەسىگىنە اينالعان ۇلى دالا يەلەرىنىڭ ءتول مەرەكەسى – ءاز-ناۋرىز! قارت تاريحتىڭ كورىكتى كەرۋەنى تۇركى جۇرتىنا جىل اينالىپ تۇراقتاعان ساتتە كوكتەمنىڭ كوركەم كەيپى جان ەلىتىپ, مەيىرىم سەبەدى. مۇنداي ىزگىلىككە بويىن جىلىتقان قازاق حالقىنىڭ جاڭا تىنىسى اشىلىپ, ءداستۇرىن دارىپتەيتىن ادەتى. بابا ميراسىن كوككە كوتەرگەن قاراورمان قاراشانى سىرتتان باقىلاساڭىز, تاتۋلىقپەن تىنىستاپ, بىرلىككە تۇتقا بولىپ تۇرعانداي. وعان وسى سۋرەت دالەل.
«ناۋرىز» كارتيناسىنىڭ يەسى – بەلگىلى قىلقالام شەبەرى داۋرەن ماكين. ۇلتتىق قۇندىلىقتارىمىزدى كەنەپ بەتىنە كەسكىندەگەن سۋرەتشىنىڭ ەڭبەگى جۇرەككە جىلى تيەدى. نەگە دەسەڭىز, عۇلاما عۇرپىمىزبەن تىنىستاپ تۇرعان كارتينانىڭ ىشىندە قازاقتىڭ بايىرعى ءبىتىم-بولمىسى, تىنىس-تىرشىلىگى قونىستانعان. قىتىمىر قىستان مال-جانى امان شىققان حالىقتىڭ كوكتەمنىڭ العاشقى مەرەكەسىمەن قاۋىشقان ءساتى ءار ءتۇرلى تۇستەرمەن ايشىقتالىپ, وقىرماننىڭ قيالىنا قانات ءبىتىرىپ تۇر.
سۋرەتشى تۇرمىستىق جانردا ورىندالعان كوپبەينەلى كارتيناسى ارقىلى قازاق حالقىنا ءتان سالتتىق وبرازداردى بەينەلەگەن. ۇلىستىڭ ۇلى كۇنىن تويلاۋعا بەت العان قاراپايىم ادامداردىڭ كوڭىل كۇيى, لالا لەبىزى, ءبىر-بىرىنە دەگەن ساعىنىشى كوزگە وتتاي باسىلادى. بەس مىڭ جىلدان استام ۋاقىتتان بەرى تويلانىپ كەلە جاتقان جىلدىڭ باستى مەيرامىن قارسى العان اۋىل حالقىنىڭ تۇرمىسى كەنەپ بەتىنە ادەمى ورنالاسقان. قۇددى سۋرەت سويلەپ تۇرعانداي كۇي كەشەسىز.
ءاز-ناۋرىز – تابيعاتتىڭ جاڭارۋ مەرەكەسى, جىلدىڭ باسى, ارماندارعا ۇمتىلىس جاسايتىن مەزەت. اتالعان مەرەكەگە حالىقتىڭ جاپپاي قاتىسىپ, ەرەكشە اتاپ وتەتىنى امبەگە ايان. جاستار التىباقان قاسىنا جينالىپ, ءان سالىپ, بي بيلەيدى. ۇلتتىق ويىندار ناسيحاتتالىپ, كۇش سىناسادى. جالىندى جىگىتتەر اراسىندا كۇرەس پەن بايگە جارىستارى ۇيىمداستىرىلىپ, اقىندار ايتىسادى. وسىنداي ۇلتقا ءتان يگىلىكتەردىڭ ءبارى كارتينادا ورىن العان. سۋرەت كومپوزيتسياسىنىڭ ەرەكشەلىگى وسىندا.
ۇزاق ۋاقىت كورىسپەگەن اقساقالدار اڭگىمە-دۇكەن قۇرسا, اق جاۋلىقتى اجەلەر كەلىندەرگە ناۋرىز كوجە جاساۋدى ۇيرەتىپ جاتىر. اتقا مىنگەن بوزبالالار سۇلۋلارعا قاراي جاقىنداي ءتۇسىپ, تانىسۋعا وقتالۋدا. اسىق ويناعان بالالاردىڭ قام-قارەكەتى قىزىق تا كۇلكىلى. سۋرەتتەن مەرەكە, ساۋىق-سايران, تىلەكتەستىك تىنىسى انىق بايقالادى.