وتكەن جىلدىڭ سوڭىندا «KEGOC» اق جيىلىك پەن قۋاتتى اۆتوماتتى رەتتەۋ جۇيەسىن قۇرۋدى اياقتادى. ول ءبىرتۇتاس ەلەكتر ەنەرگەتيكالىق جۇيە جۇمىسىنداعى ناقتى رەجىمنىڭ ۇزدىكسىز مونيتورينگىن جۇزەگە اسىرادى.
تەلەمەتريا دەرەكتەرى اۋىتقۋلاردىڭ انىقتالعانىن كۋالاندىراتىن بولسا, جيىلىك پەن قۋاتتى اۆتوماتتى رەتتەۋ جۇيەسىنە قوسىلعان ەلەكتر ستانسالارىنىڭ گەنەراتسياسىن وزگەرتۋگە كوماندا جىبەرەدى. جۇيە وتاندىق ەلەكتر ستانسالارىنىڭ مانەۆرلىك مۇمكىندىكتەرىن ءتيىمدى پايدالانۋعا جول اشادى. ونىڭ كىرىسىن ارتتىرۋعا, سونداي-اق شەكاراداعى رەسەيدىڭ ەنەرگيا جۇيەسى اراسىنداعى تەڭگەرىمسىزدىكتى ەكى ەسە ازايتۋعا مۇمكىندىك بەرەدى.
«2021 جىلى جيىلىك پەن قۋاتتى اۆتوماتتى رەتتەۋ جۇيەسىنە ەكىباستۇز گرەس-1 ستانساسى, مويناق, بۇقتىرما, ءشۇلبى جانە وسكەمەن گيدروەلەكتر ستانسالارىن قوسۋ جوسپارلانۋدا. بۇل رەتتە «KEGOC» كومپانياسى جيىلىك پەن قۋاتتى اۆتوماتتى رەتتەۋ رەسۋرستارىمەن قامتاماسىز ەتۋ جۇمىسىن جالعاستىرۋدا. قازىرگى ۋاقىتتا رەتتەۋ جۇيەسىنە «توپار باستى تاراتۋشى ەنەرگوستانساسى» جشس جانە «Karabatan Utility Solutions» جشس قوسىلۋ جايى تالقىلانۋدا. سونداي-اق ورتالىق ازيانىڭ بىرىككەن ەنەرگوجۇيەسى تاراپىنان جيىلىك پەن قۋاتتى اۆتوماتتى رەتتەۋ جوباسىنا قىزىعۋشىلىق بار», دەلىنگەن كومپانيانىڭ رەسمي حابارلاماسىندا.
قازاقستاندا جيىلىك پەن قۋاتتى اۆتوماتتى رەتتەۋ سياقتى تەحنولوگيالىق جاعىنان كۇردەلى جانە تەرەڭ عىلىمدى قاجەت ەتەتىن جوبالاردىڭ ەنگىزىلۋى سيرەك كەزدەسەدى. بۇل رەتتە جۇيەنى جوبالاۋدان باستاپ رەتكە كەلتىرۋگە جانە ىسكە قوسۋعا دەيىنگى بارلىق كەزەڭدە وتاندىق كومپانيالار جۇمىلدىرىلعان. ولار – الماتى ەنەرگەتيكا جانە بايلانىس ۋنيۆەرسيتەتى, «قازسەلەنەرگوپروەكت» ينستيتۋتى «ەنەرگوينفورم» اق جانە «JBR Group» جشس. سونداي-اق رەسەيلىك ەنەرگوجۇيەلەردى اۆتوماتتاندىرۋ ينستيتۋتى دا اتسالىسقان.
كومپانيانىڭ حابارلاۋىنشا, جوباداعى بىرلەسكەن جۇمىس قازاقستاندىق مامانداردىڭ بىرەگەي قۇزىرەتتەرىن دامىتۋعا ىقپال ەتەدى. بولاشاقتا بۇل وتاندىق كومپانيالارعا شەتەلدەردىڭ ەنەرگوجۇيەلەرىنە ۇقساس تسيفرلى جۇيەلەردى قۇرۋ كەزىندە كومەگىن تيگىزبەك.
جيىلىك پەن قۋاتتى اۆتوماتتى رەتتەۋ جۇيەسى «تسيفرلى قازاقستان» مەملەكەتتىك باعدارلاماسى اياسىنداعى ء«بىرتۇتاس ەلەكتر ەنەرگەتيكالىق جۇيەسى رەجىمدەرىن باسقارۋدىڭ اپاتقا قارسى جانە رەجىمدىك اۆتوماتيكاسىنىڭ ورتالىقتاندىرىلعان جۇيەسىن ەنگىزۋ» جوباسى شەڭبەرىندە ەنگىزىلەدى. ول پايدالانۋعا ەنگىزىلگەننەن باستاپ, جۇيەلىك وپەراتوردىڭ تابىسى جىلىنا 800 ملن تەڭگەنى قۇراۋى مۇمكىن.