نۇر-سۇلتان قالاسىنىڭ كوممۋنالدىق قىزمەتتەرى كۇشەيتىلگەن تارتىپتە ەكى اۋىسىمدا جۇمىس ىستەۋدە. بۇگىن ەلوردادا قار كۇرەۋ جۇمىستارىنا ەكى مىڭعا جۋىق جول جۇمىسشى شىقتى, 1 500-گە جۋىق ارنايى تەحنيكا جۇمىلدىرىلدى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ءبىر كۇن بۇرىن ەلوردادا جاۋعان قار مولشەرى ايلىق نورمادان اسىپ كەتتى. نۇر-سۇلتان قالاسىندا قار كۇرەۋ جۇمىستارىن جۇرگىزۋ كەشكى جانە تۇنگى ۋاقىتتا, ەكى اۋىسىمدا قارقىندى جۇرگىزىلەدى.
24 ناۋرىزدان 25-ىنە قاراعان ءتۇنى قالادان 54 مىڭ تەكشە مەتردەن استام, تاۋلىگىنە 111 مىڭ تەكشە مەتردەن اسا قار شىعارىلدى. قاردى كۇرەۋگە 1200-دەن استام ارنايى تەحنيكا مەن 200-دەن استام جول جۇمىسشى شىقتى.
بۇگىن نۇر-سۇلتاندا قار كۇرەۋ جۇمىستارىنا 2000-عا جۋىق جول جۇمىسشى مەن 1500-گە جۋىق ارنايى تەحنيكا جۇمىلدىرىلدى.
ءبىرىنشى كەزەكتە, ەرەجە بويىنشا, جولداردا كەپتەلىس بولماۋى ءۇشىن قوزعالىسى وتە قارقىندى ۋچاسكەلەر تازارتىلادى. ودان ءارى ورتاشا قارقىندى ۋچاسكەلەر – الاڭدار, ۆوكزال ماڭىنداعى اۋماقتار, تروتۋارلار جانە ت.ب. اۋماقتاردىڭ قارى كۇرەلەدى.
جينالعان قار ەلورداداعى 11 پوليگونعا شىعارىلادى. پوليگونداردا باقىلاۋ ءۇشىن فوتو جانە بەينەكامەرالار ورناتىلعان.
قىسقى كەزەڭنىڭ باسىنان بەرى قالادان 4 600 000 تەكشە مەتردەن استام قار شىعارىلدى.