«Egemen Qazaqstan» گازەتىندە ۇيىمداستىرىلعان «ۇلتتىق حالىق ساناعى: ۇپاي تۇگەندەلەتىن تاريحي ءسات» اتتى دوڭگەلەك ۇستەلىندە ءبىلىم جانە عىلىم مينيسترلىگى عىلىم كوميتەتى ەكونوميكا ينستيتۋتىنىڭ عىلىمي قىزمەتكەرى, الەۋمەتتانۋشى ايسۇلۋ مولدابەكوۆا حالىق ساناقتارى ناتيجەسىندە الىنعان اقپارات تۇرعىنداردىڭ الەۋمەتتىك جاعدايىن قانشالىقتى شىنايى باعالاي الاتىنىن ايتتى, دەپ حابارلايدى Egemen.kz.
– حالىق ساناعى – قوعامنىڭ الەۋمەتتىك-دەموگرافيالىق بەينەسىن باعالاۋدىڭ قۇرالى. ساناق ارقىلى مەملەكەتتە ەڭ ۇلكەن مالىمەتتەر بازاسى قالىپتاسادى. ءبىز جاسايتىن ءتۇرلى الەۋمەتتىك ساۋالنامالار, وزگە زەرتتەۋلەردىڭ ىرىكتەۋىنىڭ كولەمى 1600, 2 مىڭ, 7 مىڭ, ەڭ كوبىندە 10 مىڭ بولادى. ستاتيستيكا كوميتەتى جۇرگىزەتىن ساۋالدامالارعا قاتىساتىن ادامدار سانى 10 مىڭنان اسپايدى. 100 مىڭ, 200 مىڭ نە 1 ملن ادام قاتىساتىن ساۋالدامالار جۇرگىزىلمەيدى دەۋگە دە بولادى. حالىقتىڭ تۇرعىن ءۇي جاعدايى, وتباسىلىق قۇرامى, ەتنوستىق سيپاتى, ۇلتى, ءدىنى, ءتىل ءبىلۋى, ءبىلىم دەڭگەيى, كوشى-قون, بولاشاقتا كوشۋ جوسپارى, نەكە تۋرالى مالىمەتتەر, جۇمىسپەن قامتىلۋ دەڭگەيى, تابىس كوزدەرى, دەنساۋلىعى, تۇرمىستا ايرىقشا كۇتىمدى قاجەت ەتەتىندىگى سەكىلدى ماڭىزدى الەۋمەتتىك كورسەتكىشتەردى انىقتاۋعا بولادى. ال بۇل ولشەمدەر بويىنشا جالپىحالىقتىق دەڭگەيدە جينالعان اقپارات بىزگە قۇندى مالىمەت بەرەدى. ناتيجەسىندە حالىقتىڭ الەۋمەتتىك تۇرمىسىن باعالاۋعا مۇمكىندىك تۋادى. الەۋمەتتىك جاعدايدى ساندىق تۇرعىدا ولشەيتىن بولساق, ءبىز ازاماتتاردىڭ تابىس كولەمىن دە بىلگىمىز كەلەدى. مۇنداي ماسەلە وزگە ەلدەردە دە كەزدەسەدى. الايدا, حالىقتىڭ كوپشىلىگى تابىسى تۋرالى ساۋالدان جالتارىپ, جاۋاپ بەرگىسى كەلمەيدى. بۇل سۇراققا جاۋاپ الۋ ىقتيمالدىلىعى تومەن نە شىنايى بولماۋىنا بايلانىستى بىزدە بۇل ساۋال قويىلمايدى. سول سەبەپتى حالىقتىڭ تۇرمىسىن, الەۋمەتتىك جاعدايىن ساندىق تۇرعىدا باعالاۋ وتە قيىن, – دەدى ايسۇلۋ مولدابەكوۆا