كوكتەمگى كۇن مەن ءتۇننىڭ تەڭەلىپ, جالعاندا جارىق كوبەيە باستايتىن ناۋرىز مەرەكەسىن باتىسقازاقستاندىقتار 14 ناۋرىزدا «كورىسۋ ايتىمەن» باستاپ كەتەتىنى بەلگىلى. بۇل كۇننىڭ نەگىزگى اتريبۋتى – ەلدىڭ ۇلكەنىنە, اۋىلدىڭ اقساقالىنا ارنايى بارىپ سالەم بەرىپ, اق باتاسىن الۋ.
ەش ادامنىڭ ۇلتىنا, سەنىمىنە قاراماي, قول الىسىپ قۇرمەت كورسەتەتىن كەرەمەت ءۇردىس بۇگىندە بۇكىل ەلىمىزگە تاراپ كەتكەنى راس. اسىرەسە باتىس قازاقستان وبلىسىنداعى قازاقستان حالقى اسسامبلەياسىنىڭ مۇشەلەرى وسى مەرەكەنى ورال قالاسىندا ءماندى, ماعىنالى وتكىزدى. «جاڭا ءومىر, جاڭا كۇنمەن كورىسۋ» اتتى شارا اياسىندا وبلىس ورتالىعىندا تۇراتىن ەڭبەك ارداگەرلەرىنىڭ ۇيىنە بارىپ, ارنايى سالەم بەرگەن ءبىر توپ جاستار ءداستۇرلى مەرەكەنىڭ شىعۋ تاريحى مەن ءجون-جوباسىن ۇلكەندەردەن سۇراپ ءبىلدى.
اسسامبلەيانىڭ ورال قالاسى شاعىن اۋداندارى بويىنشا قوعامدىق كەلىسىم كەڭەسىنىڭ توراعاسى قانات ورازعاليەۆ اقساقال ايتۋلى مەرەكەگە بارىنشا دايىندالعان ەكەن. ۇلتتىق كيىمىن كيىپ, كەلگەن قوناقتاردى قۇشاق جايا قارسى العان قاريا جاستارعا اق باتاسىن جاۋدىرىپ, ورتاق وتانىمىز – قازاقستان رەسپۋبليكاسىندا تاتۋلىق پەن ءداستۇر ساباقتاستىعى ساقتالسا, ەلىمىزدىڭ بولاشاعى باياندى بولاتىنىنا سەنەتىنىن ايتتى.
بۇدان كەيىن جاستاردى بەلگىلى ەڭبەك ارداگەرى, مۇستاحيم ىقسانوۆ اتىنداعى قوعامدىق قوردىڭ توراعاسى اسقار اتاەۆ اقساقالدىڭ دامگە تولى داستارقانى قارسى الدى. سەكسەنگە كەلىپ قالسا دا سەرگەكتىگىن جوعالتپاعان اقساقال كەيىنگى ۇرپاققا ۇلگى بولاتىن وسيەتىن ايامادى.
اسسامبلەيانىڭ قوعامدىق كەلىسىم كەڭەسىنىڭ مۇشەسى, ەلگە ەڭبەگى سىڭگەن ماتەماتيك-مۇعالىم ماقسوت راحيمبەردين ءالى كۇنگە دەيىن بالالاردى ماتەماتيكاعا جانە شاحماتتىڭ قىر-سىرىنا باۋلىپ كەلەدى. شاڭىراعىنا كورىسە كەلگەن ءتۇرلى ۇلت جاستارىن قۋانا قارسى العان ماقسوت قۋانىش ۇلى «جاڭبىرمەنەن جەر كوگەرەر, باتامەنەن ەل كوگەرەر» دەگەن قازاق ناقىلىنىڭ ءمانىن ءتۇسىندىرىپ, كەلگەندەرگە شىنايى باتاسىن بەردى.
– وسى شاراعا قاتىسقانىما وتە قۋانىشتىمىن. ءوزىم حامزا ەسەنجانوۆ اتىنداعى باتىس قازاقستان وبلىستىق بالالار مەن جاسوسپىرىمدەر كىتاپحاناسىندا قىزمەت ەتكەندىكتەن, تۋعان جەرگە, وتانعا دەگەن قۇرمەت بالا كۇننەن قالىپتاساتىنىن جاقسى بىلەمىن عوي. ەلگە ەڭبەگى سىڭگەن اعا بۋىنمەن ءجيى كورىسۋ جاستارعا وتە پايدالى بولدى. ونىڭ ۇستىنە پاندەميانىڭ كەسىرىنەن مۇنداي ماعىنالى كەزدەسۋلەرگە سۋساپ قالىپ ەدىك, – دەيدى كىتاپحاناشى, «كىتاپحانا ءىسىنىڭ ۇزدىگى» مەدالىنىڭ يەگەرى سەرگەي بىكوۆ.