ۇلى دالادا جارىق دۇنيە ەسىگىن اشىپ, ۇلى دالادا نەبىر ىقىلىم زاماننان بەرى ۇلت بولىپ, ەل بولىپ قالىپتاسقان حالقىمىز تابيعاتتىڭ ءاربىر قۇبىلىسىنىڭ قاباعىنا قاراپ, دۇلەيىمەن الىسىپ, كۇنگەيىمەن قۋانا قاۋىشىپ كۇن كەشكەن. ياعني تابيعاتتىڭ ءتول پەرزەنتى بولعان. اسپانداعى كۇننىڭ دە, استىنداعى جەردىڭ دە قادىرىن بىلگەن.
جاراتۋشىنىڭ ادام بالاسىنا بەرگەن وسىناۋ نىعمەتتەرىن قۇت, بەرەكە دەپ بىلگەن. ونى ۇنەمدەپ شاشپاي توكپەي كەرەگىنە جاراتقان. جاراتۋشىنىڭ سۋ, اۋا, جەر, وسىمدىك, مال ءتارىزدى نىعمەتتەرىن ايالاي بىلگەن. ۇلى جاراتۋشى ادام پەشەنەسىنە جازعان وسىناۋ نىعمەتتەردى ساقتاۋدىڭ, مولايتۋدىڭ قىر-سىرىنا قانىققان. قىزىعىن كورگەن.
حالقىمىز ەرتەدەن-اق جاراتۋشى سىيعا بەرگەن بۇل بايلىقتارمەن قارىم-قاتىناس جاساي بىلگەن. اۋا, سۋ, جەر, ءتورت ت ۇلىكتى سوندىقتان دا ايالاعان. وسىناۋ تابيعات سىيىن ايالاي بىلگەندە عانا ارمانسىز كۇن كەشەتىنىن ۇققان. بۇلاردى كيە تۇتقان. ول بايلىقتاردى ىسىراپتاماعان. كەرىسىنشە كوبەيتكەن. سول مول بايلىقتىڭ ءبىرى سۋ ەدى. سۋسىز ءومىر تۇل ەدى. سۋ جاڭبىر بولىپ جاۋادى. بۇلاق بولىپ اعادى. توپىراق ونى ىشەدى. ودان ورگەن وسىمدىكتى مال جەيدى. مالدى ادام جەيدى. ونسىز ءومىر توقتايدى. سونى تۇيگەن دالالىقتار جەر, سۋ, اۋا, وسىمدىك, مالدى, جىلۋدى كيە تۇتتى. ادام ادام بولۋ ءۇشىن ولاردىڭ كوزىن اشتى. كوبەيتتى. جەر-انا ءبىزدى بۇلاعىمەن ەمىزەدى. سول بۇلاقتىڭ كوزىن اشۋ ءار پەندەنىڭ مىندەتى. اسىرەسە, بۇگىنگىدەي ۇلىستىڭ ۇلى كۇنى – ناۋرىز كۇندەرى دالالىقتار تابيعات – انا سۇتىندەي سۋ كوزىن اشۋدى ۇرپاعىنا ۇلگى ەتكەن. ءبىر بۇلاقتىڭ كوزىن اشساڭ ءومىر اتتى مىڭ بۇلاق سالتانات قۇرماق. كوسەگەسى كوگەرىپ تىرلىك بۇرشىك اتپاق. سەن قاداعان تال شىبىق كۇنى ەرتەڭ بۇرشىك اتىپ ماۋەلەمەك. يگىلىككە اينالماق.
دانا حالقىمىز سوندىقتان كوكتەم كەلە بۇلاق كوزىن اشقان. جىلۋ مەن جەر, سۋ تىرلىك باستاۋى دەپ بىلگەن. تىرلىك كوزى اشىلسا, ءومىر كوشى توقتاماعان. سول سالتتىڭ ارقاسىندا حالىق بار بولعان. ءبىز بار بولعانبىز. ەندەشە, ىلعي دا بار بولايىق!
سماعۇل ەلۋباەۆ,
جازۋشى