دۇنيەجۇزىلىك دەنساۋلىق ساقتاۋ ۇيىمىمەن بىرلەسىپ Covid-19 شتاممدارىن انىقتايتىن ەكسپرەسس پتر-سكرينينگتىڭ جاڭا ادىستەمەسى ەنگىزىلدى. ۇلتتىق قوعامدىق دەنساۋلىق ساقتاۋ ورتالىعى فيليالىنىڭ رەفەرەنس-زەرتحاناسى الماتى قالاسى بويىنشا كۆي-مەن اۋىراتىن ناۋقاستاردان الىنعان زەرتحانالىق ۇلگىلەردى زەردەلەدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
زەرتتەۋ ناتيجەلەرى بويىنشا «بريتاندىق», «وڭتۇستىك افريكا», «برازيليالىق» شتامدارعا ۇقساس ىقتيمال مۋتاتسيا انىقتالدى. مۋتاتسيانى جانە ونىڭ وسى شتاممداردىڭ بىرىنە جاتاتىنىن ناقتى راستاۋ تولىق گەنومدىق سەكۆەنيرلەۋ اياقتالعاننان كەيىن ءبىر اي ىشىندە ايقىندالادى.
ايتا كەتۋ كەرەك, كۆي-ءدىڭ الدىن الۋ جانە مۋتاتسيانى ەمدەۋ شارالارى قولدانىستاعى تاسىلدەرگە ۇقساس. بۇل ماسكا رەجيمىن جانە الەۋمەتتىك اراقاشىقتىقتى ساقتاۋ, ادام كوپ جينالاتىن ورىندارعا بارماۋ, سونداي-اق حالىقتى جاپپاي ۆاكتسيناتسيالاۋ.
ن.ف.گامالەيا اتىنداعى ەپيدەميولوگيا جانە ميكروبيولوگيا عىلىمي-زەرتتەۋ ورتالىعىنىڭ مالىمەتتەرى بويىنشا قازىر قازاقستان رەسپۋبليكاسىندا قولدانىلاتىن گام-كوۆيد-ۆاك (سپۋتنيك V) ۆاكتسيناسىنىڭ «بريتاندىق» شتاممعا تيىمدىلىگى دالەلدەندى.
دەمالىس جانە مەرەكە كۇندەرى قارساڭىندا كۆي-ءدىڭ تارالۋىنا جول بەرمەۋ ءۇشىن ءتيىستى ساقتىق شارالارىن مۇقيات ساقتاۋدى ەسكە سالامىز.