ەسىرتكى زاتتارىن زاڭسىز جەتكىزۋ جامبىل وبلىسىنىڭ شۋ اۋدانىنان جانە اتالعان وبلىس تۇرعىنىنىڭ ۇيىمداسقان توپ مۇشەسىنىڭ قاتىسۋىمەن جۇزەگە اسىرىلعان, دەپ حابارلايدى Egemen.kz
– 2019 جىلعى قاراشادا پاۆلودار وبلىسىنىڭ پوليتسيا دەپارتامەنتى ارنايى جەدەل-ىزدەستىرۋ ءىس-شارالارىن جۇرگىزۋ بارىسىندا پاۆلودار قالاسىنىڭ اۋماعىندا ەسىرتكى قۇرالدارىن زاڭسىز وتكىزۋمەن ۇزاق ۋاقىت بويى اينالىسقان وبلىس ورتالىعىنىڭ تۇرعىنى باستاعان ۇيىمداسقان توپتىڭ قىلمىستىق ارەكەتىنىڭ جولىن كەستى, – دەدى پاۆلودار وبلىسى پوليتسيا دەپارتامەنتى باستىعىنىڭ ورىنباسارى راشاد وتەۋوۆ.
قىلمىستىق توپتىڭ قۇرامىنا ونىڭ ەكى ۇلى, بىرگە تۇراتىن ايەلى, ۇلدارىنىڭ ءبىرىنىڭ ايەلى, سونداي-اق پاۆلودار قالاسىنىڭ ەسىرتكىگە تاۋەلدى ادامدارى تارتىلدى. قىلمىستىق توپ باسشىسى مەن ونىڭ ۇلدارىنىڭ تۇرعىلىقتى جەرى بويىنشا اۋقىمدى تەرگەۋ جانە جەدەل ىزدەستىرۋ ءىس-شارالارىن جۇرگىزۋ بارىسىندا اسا ءىرى مولشەردە «گاشيش», «گەروين», سونداي-اق 200 كەلىدەن استام «ماريحۋانا» ەسىرتكى, سونداي-اق اتىس قارۋى تاركىلەندى.مامانداندىرىلعان تەرگەۋ سوتىنىڭ سانكتسياسىمەن قىلمىستىق توپتىڭ قاتىسۋشىلارىنا قاتىستى كۇزەتپەن ۇستاۋ تۇرىندەگى بۇلتارتپاۋ شاراسى قولدانىلدى.
– 2020 جىلدىڭ 30 جەلتوقسانىندا پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىمەن ۇيىمداسقان قىلمىستىق توپتىڭ جەتەكشىسى 18 جىلعا باس بوستاندىعىنان ايىرىلدى, قالعان 7 قاتىسۋشى, ونىڭ ىشىندە اسىراۋىندا 3 كامەلەتكە تولماعان بالاسى بار ايەل 16 جىلعا باس بوستاندىعىنان ايىرىلدى, – دەپ اتاپ ءوتتى راشاد وتەۋوۆ.
2021 جىلعى 12 ناۋرىزدا پاۆلودار وبلىستىق سوتىنىڭ قىلمىستىق ىستەر جونىندەگى اپەللياتسيالىق سوت القاسىنىڭ قاۋلىسىمەن ءبىرىنشى ساتىداعى ۇكىم وزگەرىسسىز قالدى.