اليك شپەكباەۆ يوردانيانىڭ توتەنشە جانە وكىلەتتى ەلشىسىمەن كەزدەستى

اڭگىمەلەسۋ بارىسىندا سىبايلاس جەمقورلىققا قارسى ۆەدومستۆو باسشىسى سوڭعى زاڭنامالىق باستامالار تۋرالى حاباردار ەتتى. اتاپ ايتقاندا, اكىمشىلىك سىبايلاس جەمقورلىق قۇقىق بۇزۋشىلىقتار تىزبەسىن كەڭەيتۋ جانە اگەنتتىككە جاقىن ارادا قاجەتتى قۇزىرەتتەر بەرۋ تۋرالى اڭگىمە بولدى.

شەتەلدىك ديپلومات انتيكور جۇرگىزىپ جاتقان جۇمىستىڭ سەرپىندىلىگىن, سونداي-اق, وعان دەگەن يوردانياداعى پاراساتتىلىق جانە سىبايلاس جەمقورلىققا قارسى ءىس-قيمىل جونىندەگى كوميسسيا تاراپىنان جوعارى قىزىعۋشىلىقتى اتاپ ءوتتى. ەكى ۆەدومستۆو اراسىندا جاسالعان ىنتىماقتاستىق تۋرالى مەموراندۋم اياسىندا, Covid-19 پاندەمياسىنا بايلانىستى شەكتەۋلەر الىپ تاستالعان جاعدايدا, اعىمداعى جىلدىڭ جازىندا يوردان دەلەگاتسياسىنىڭ نۇر-سۇلتان قالاسىنا ساپارى ۇيىمداستىرىلادى.

يۋسۋف ابدەلعاني مىرزا مەملەكەتتىك قىزمەتتەگى جاعىمسىز قىلىقتاردىڭ تەرىس سالدارىن اتاپ ءوتتى: ء«وز ۇستانىمىن تەرىس پايدالانعان كوشباسشى بۇكىل جۇيەنى بۇزادى. ونىڭ تەك زاڭ الدىندا عانا ەمەس, بۇكىل حالىق الدىندا جاۋاپتى ەكەنىن ءتۇسىنۋ قاجەت».

ەلشى بيزنەستى قورعاۋ تۇرعىسىنان سىبايلاس جەمقورلىققا قارسى ءىس-قيمىلدىڭ ماڭىزدىلىعىنا ەرەكشە نازار اۋداردى. ول 7 ساۋىردە وتەتىن الداعى Business Integrity Forum اياسىندا يوردانياداعى ينۆەستيتسيالاردى قولداۋ جانە قورعاۋ تۋرالى باياندايدى.

كەزدەسۋ سوڭىندا ديپلوماتقا ازاماتتارمەن تىكەلەي جۇمىس ىستەۋ ءۇشىن اشىلعان انتيكور-ورتالىق تانىستىرىلدى. وندا ءباسپاسوز ورتالىعى دا ورنالاسقان. ونىڭ جۇمىسى اياسىندا «Antikor.Live» جوباسى ىسكە اسىرىلۋدا, ول سىبايلاس جەمقورلىققا قارسى ساياساتپەن قانداي دا ءبىر تۇردە جاناساتىن ماسەلەلەردى ءتۇرلى سالالارداعى ساراپشىلاردىڭ ءتۇسىندىرۋى ءۇشىن الاڭ رەتىندە اشىلعان. يوردانيالىق ارىپتەستەر سىبايلاس جەمقورلىققا قارسى حاباردارلىقتى ارتتىرۋ جونىندەگى ءىس-شارالاردى ىسكە اسىرۋ اياسىندا وسى تاجىريبەنى قولدانباق.

ابدەلعاني مىرزا جوبانىڭ Facebook جانە Youtube الەۋمەتتىك جەلىلەرىندە وتكەن تىكەلەي ەفيرىنە قاتىستى. شەتەلدىك ديپلوماتيالىق كورپۋس وكىلىنىڭ قاتىسۋىمەن سۇحبات العاش رەت «قازاقپارات» حاا سايتىندا كورسەتىلدى.