«جامبىل جاباەۆ مۇراسى جانە تاريحي ءداۋىر» تاقىرىبىندا دوڭگەلەك ۇستەل ءوتتى

جىر ءدۇلد ۇلى جامبىلدىڭ تەرەڭ مازمۇندى رۋحاني مۇراسىن زەرتتەۋ مەن زەردەلەۋدى ارقاۋ ەتكەن دوڭگەلەك ۇستەل باسىندا تاريحشىلار اقىن مۇراسىن حالقىمىزدىڭ رۋحاني يگىلىگىنە اينالدىرۋ باعىتىنداعى تۇجىرىمدارىن ورتاعا سالىپ, رۋحانيات الەمىندەگى, سونىمەن بىرگە وسكەلەڭ ۇرپاق تاربيەسىندەگى ءمانى مەن ماڭىزى تۇرعىسىنداعى عىلىمي نەگىزدى ويلارىن ورتاعا سالدى.

زامانا ءۇنىن اقىن جانىمەن جىرلاعان جامبىل مۇراسىنان سۋىرىپ سالمالىعى, كەستەلى ءسوزدىڭ شەبەرى, ۇشقىر ويلى, تاپقىر شەشەندىگى ايقىن كورىنەدى. اقىننىڭ جاۋھار جىرلارىنىڭ وتاندىق عىلىم ءۇشىن اۋقىمى كەڭ.  جامبىل شىعارماشىلىعى قازاقستان تاريحشىلارىن تاريحي وبەكتيۆتى شىندىقتان اۋىتقىماي زەرتتەۋگە ۇيرەتەدى. جامبىل جىراۋلاردىڭ بايتاق ەپيكالىق ءداستۇرىن, قازاق ءسوز ونەرىندەگى عاجايىپ يمپروۆيزاتسيالىق ءۇردىستى بۇتىندەي جاڭا ارناعا بۇرىپ, وعان جاڭا مازمۇن دارىتۋى كۇدىك تۋدىرمايدى. جامبىل – ىزگىلىك جولىنداعى ازاتشىل ازاماتتى ناسىلىنە, ۇلتىنا بولمەگەن شىن مانىندەگى جاسامپاز اقىن. جامبىل جىرلارى تەڭىز تۇبىندە شاشىلىپ جاتقان مارجان سەكىلدى. جامبىل – جىردىڭ تولاسسىز بۇلاعى, وشپەس ونەگەسى, توزبايتىن اسىلى. حالىقتىق جىردىڭ نەگىزىندە نەمەسە جىراۋلار پوەزياسىنىڭ ۇلگىسىندە بۇگىنگى مەن وتكەندى ساباقتاستىرا جىرلايتىن اقىندار سول كەزەڭدە جوقتىڭ قاسى بولاتىن. جامبىل سول ءۇردىستى قالىپتاستىرا ءبىلدى. ول جاسامپاز ۇرپاقپەن سىرلاسىنداي, قيماسىنداي ماڭگى بىرگە جاساي بەرەدى.

وسى مازمۇندا جالعاسىن تاپقان دوڭگەلەك ۇستەل بارىسىندا قازاقستاننىڭ تاريح عىلىمىندا جامبىل جاباەۆتىڭ رۋحاني مۇراسىن پايدالانۋدىڭ جانە دامىتۋدىڭ جاڭا جولدارى قاراستىرىلدى. جامبىلدىڭ رۋحاني مۇراسىنىڭ قازاقستان تاريحىنا ىقپالىن ساراپتاي كەلە رەسپۋبليكالىق ونلاين دوڭگەلەك ۇستەلگە قاتىسۋشىلار اقىننىڭ رۋحاني مۇراسىنىڭ تاريحي قارلارىن زەرتەۋگە ارنالعان گرانتتىق قارجىلاندىرۋ جوبالارىن دايىنداۋ جانە ۇسىنۋعا بايلانىستى جانە دە ءداۋىر تاريحىنا قاتىستى پىكىرلەرىن, كوزقاراستارىن, يدەيالارىن ساراپتاۋعا ارنالعان كەشەندى زەرتتەۋلەر جۇرگىزۋدى, جامبىل ەسىمى جاڭاشىلدىقتىڭ ۇردىسىندە كوش باستايتىن, شىعارماشىلىعى ءالى دە زەرتتەۋدى قاجەت ەتەتىن بىردەن-ءبىر تۇلعا بولعاندىقتان عىلىمي-زەرتتەۋ ينستيتۋتتارى, ۋنيۆەرسيتەتتەر بىرلەسىپ, اقىننىڭ ءومىرى مەن قىزمەتىنە ارنالعان جيناقتى جارىققا شىعارۋدى ۇسىندى. سونداي-اق, تاريحشى عالىمدار جامبىلدىڭ ءومىرى مەن قىزمەتىنە, شىعارماشىلىعىنا ارنالعان ماقالالاردى تاريحي ەنتسيكلوپەديالارعا, وقۋلىقتارعا, كوپتومدىق قازاقستان تاريحىنا ەنگىزۋ, اقىننىڭ رۋحاني مۇراسى نەگىزىندە قازاقستاندىق وتانشىلدىقتى, ەڭبەكسۇيگىشتىكتى, گۋمانيزمدى, شىنشىلدىقتى تاربيەلەۋ, تاريحي سانانى قالىپتاستىرۋ تۇجىرىمداماسىن جاساۋمەن قاتار ۇلتتىق قۇندىلىقتارعا, ونىڭ اقتاڭداق بەتتەرىنە قاتىستى وي-پىكىرلەرىن, يدەيالارىن جۇيەلەۋ ارقىلى ولاردى حالىقتىڭ رۋحاني يگىلىگىنە اينالدىرۋ جولدارىن كورسەتۋگە بايلانىستى ماسەلەلەردى ورتاعا سالدى.