ىشىمدىك ءىشىپ الىپ قىزمەتتىك كولىك جۇرگىزگەن تالدىقورعان اكىمدىگىنىڭ قۇرىلىس ءبولىمىنىڭ باسشىسى جۇمىستان قۋىلدى. سونداي-اق قالا اكىمىنىڭ ورىنباسارى ساۋلە ارزانبەكوۆا «قاتاڭ سوگىس» الدى, دەپ حابارلايدى Egemen.kz قازاقپاراتقا سىلتەمە جاساپ.
ەستەرىڭىزگە سالا كەتەيىك, تالدىقورعان قالالىق قۇرىلىس ءبولىمىنىڭ باسشىسى كوشەنىڭ قاق ورتاسىندا ايەلىن ۇرىپ, ۆيدەوعا ءتۇسىپ قالعان بولاتىن. ءدال وسى شەنەۋنىك ىشىمدىك ىشكەن كۇيىندە قىزمەتتىك كولىك جۇرگىزىپ, پوليتسەيلەرگە ۇستالعان.
سوڭىنان بەلگىلى بولعانداي, قالالىق اكىمدىكتىڭ بىرنەشە قىزمەتكەرى باس قوسىپ, قوعامدىق ورىنداردىڭ بىرىندە وتىرعان. وتىرىستاعى اڭگىمە ارتى داۋعا ۇلاسادى. 13 ناۋرىز كۇنى تۇنگى 24:00 – 01.00 شاماسىندا تۇسىرىلگەن ۆيدەو بويىنشا قىزمەتتىك تەكسەرۋ جۇرىگىزىپ, قورىتىندىسى جاريالاندى.
«تالدىقورعان قالاسى اكىمىنىڭ ورىنباسارى س.ا.ارزانبەكوۆاعا وزىنە جۇكتەلگەن فۋنكتسيونالدىق مىندەتتەردى تيىسىنشە ورىنداماعانى ءۇشىن «قاتاڭ سوگىس» تۇرىندەگى تارتىپتىك جازا قولدانىلدى. «تالدىقورعان قالاسىنىڭ قۇرىلىس ءبولىمى» مم-ءنىڭ باسشىسى م.ا.نۇرعاليەۆتى جۇمىستان بوساتىلدى. «تالدىقورعان قالاسىنىڭ كاسىپكەرلىك ءبولىمى» مم-ءنىڭ باسشىسى ن.ا. قالياحمەتوۆكە وزىنە جۇكتەلگەن فۋنكتسيونالدىق مىندەتتەردى تيىسىنشە ورىنداماعانى ءۇشىن «قىزمەتكە تولىق سايكەس ەمەستىگى» تۇرىندەگى تارتىپتىك جازا, «تالدىقورعان قالاسىنىڭ ەكونوميكا جانە بيۋدجەتتىك جوسپارلاۋ ءبولىمى» مم-ءنىڭ باسشىسىنىڭ ورىنباسارى ا.س. پەنگە تارتىپتىك جازا قولدانىلدى», دەلىنگەن تالدىقورعان قالالىق اكىمىنىڭ ءباسپاسوز قىزمەتى تاراتقان حابارلامادا.