«بارىس» ماۋسىمدى اياقتادى

«بارىس» حوككەيشىلەرىنىڭ ءوز جان­كۇيەرلەرىن بۇدان دا جوعارى ناتيجەمەن قۋانتۋعا تولىق مۇمكىندىكتەرى بار ەدى. الايدا سوڭعى باسەكەلەردە جەرلەستەرىمىزگە شىدامدىلىق پەن سپورتشىعا ءتان جىگەرلى مىنەزدىڭ جەتىسپەي قالعانىن بايقادىق. سەبەبى كەي ويىنداردا ەسەپتە الدا تۇر­عانىمەن, ماتچ سوڭىندا قولدا تۇرعان جەڭىستى ۋىستارىندا ۇستاي المادى. ايت­پەسە, وسىدان ءدال ءبىر جىل بۇرىن ءبىزدىڭ جىگىتتەر پلەي-وفف كەزەڭىندە «مەتاللۋرگ» كومانداسىمەن جولىعىپ, بەس كەزدەسۋدە 4:1 ناتيجەسىمەن ايلاسىن اسىرىپ كەتكەن بولاتىن. دەي تۇرعانمەن ەلوردالىق كوماندا بيىل ءوز الدىنا قويعان ماقساتتى 100 پايى­ز ورىندادى دەۋگە بولادى. ويتكەنى ماۋسىم الدىندا «بارىستىڭ» باس مەنەدجەرى ۆياچەسلاۆ بەلان AllHockey.ru باسىلىمىنا بەرگەن سۇحباتىندا «كلۋبتىڭ باستى ماقساتى – گاگارين كۋبوگىنىڭ پلەي-وفف كەزەڭىنە دەيىن جەتۋ», دەگەن بولاتىن.

ارينە, بىلتىرعى ناتيجەنى جاقسارتا الماسا دا, العا قويعان مەجەگە جەتىپ جى­عىلعانىنىڭ ءوزى جەتىستىك. ونىڭ ۇستىنە «بارىس» الەمدىك پاندەمياعا بايلانىس­تى جاڭا ماۋسىمعا جارىتىپ دايىندالا العان دا جوق. ءتىپتى, جاز مەزگىلىندە بيىلعى دوداعا قاتىسۋ-قاتىسپاۋىنىڭ ءوزى ۇلكەن ماسەلە بولدى. ەلدەگى ەپيدەميالىق احۋال حوككەيشىلەرگە تۇراقتى بىرىنشىلىك الدىندا وقۋ-جاتتىعۋ جيىنىن وتكىزۋگە مۇمكىندىك بەرگەن جوق. تەك ماۋسىمعا ءبىر اي قالعان كەزدە عانا, ياعني تامىز ايىندا تولىققاندى جاتتىعۋعا كىرىستى. سونىمەن قاتار «بارىس» جىلدا تۇراقتى بىرىنشىلىك الدىندا شايبالى حوككەيدەن ءداستۇرلى پرەزيدەنت كۋبوگى جارىسىنا قاتىسىپ, دايىندىعىن ءبىر پىسىقتاپ الاتىن. تاعى سول كوروناۆيرۋسقا بايلانىستى بۇل جارىس بىلتىر مۇلدە ۇيىمداستىرىلمادى.

پاندەمياعا بايلانىستى كلۋبتىڭ بيىلعى قارجىلىق جاعدايى دا وتكەن جىلمەن سالىستىرعاندا اسا ءماز بولعان جوق. ناتيجەسىندە وتكەن ماۋسىمدا «با­رىستى» ورگە سۇيرەگەن ويىنشىلاردىڭ ءبىر شوعىرى, اتاپ ايتقاندا باس باپكەر اندرەي سكابەلكا, قاقپاشى ەددي پاس­كۋالە, تاسقامال قورعاۋشى اتتە وح­تاماا, «بارىستىڭ» ەڭ ۇزدىك شابۋىلشىسى اتانعان كوربەن نايت پەن تاعى ءبىر تاجىريبەلى شابۋىلشى يرو پاكارينەن كوماندادان كەتتى. بالكىم, اتالعان حوككەي­شىلەر بيىل دا ەلوردا كلۋبىندا ونەر كورسەتكەندە «بارىس» ءبىراز جەرگە جەتەر مە ەدى, كىم ءبىلسىن؟! ونىڭ ۇستىنە كوماندانى جاتتىقتىرۋ قحل-دا تاجىريبەسى جوق يۋري ميحايليسكە سەنىپ تاپسىرىلعانىن دا ۇتىمدى شەشىم دەي الماساق كەرەك. ارينە, بۇل جەردە كوماندا باسشىلىعىنىڭ كورپەسىنە قاراي كوسىلگەنى انىق.

ءسويتىپ ماۋسىمارالىق ۇزىلىستە «بارىس» تىزگىنىن ۇستاعان 51 جاستاعى وتان­دا­سىمىز يۋري ميحايليس جازعى ترانسفەر­دە جوعارىداعى ويىنشىلاردىڭ ورنىن باسادى دەگەن ۇمىتپەن شەتتەن بىر­نەشە حوككەيشى الدىرتتى. ماسەلەن, جاز­دا كومانداعا فينليانديالىق قاقپاشى يوني ورتيو, شۆەتسيالىق شابۋىلشى ياكوب ليليا, كانادالىق شابۋىلشى مەتت فرەتتين مەن قورعاۋشى ديللون حە­تەرينگتون قوسىلسا, ماۋسىم ورتاسىن­دا «بارىس» قۇرامىن فينليانديالىق قور­عاۋشى الەكس لينتۋنيەمي جانە كا­نادالىق شابۋىلشى فيليپ ۆارونە تو­لىقتىردى. بۇل ويىنشىلاردىڭ كومان­داعا قانشالىقتى كومەگى تيگەنىنە باعانى جانكۇيەرلەر بەرە جاتار.

ماۋسىم الدىنداعى ءبىر سۇحباتىندا يۋري ميحايليس بيىل جاستارعا سەنىم ارتاتىنىن ايتقان بولاتىن. بىراق باس باپكەر «بارىستىڭ» قوسالقى قۇرامى سانالاتىن «نوماد» جانە جاستار وينايتىن «سنەجنىە بارسى» قۇرامىندا ونەر كورسەتكەن قورعاۋشى سامات دانيار مەن تاميرلان گايتاميروۆ, شابۋىلشىلاردان زاحار پارحومەنكو مەن ماكسيم مۋسوروۆقا «بارىستىڭ» ساپىندا شەبەرلىكتەرىن شىڭداۋعا تولىققاندى مۇمكىندىك بەرگەن جوق. بۇل حوككەيشىلەر بولاشاق قازاقستان قۇراماسىنىڭ ويىنشىلارى ەكەنىن ەستەن شىعارماعان ءجون ەدى.

«بارىستىڭ» وسى ماۋسىمداعى ستاتيس­تيكاسىنا از-كەم كوز جۇگىرتسەك. تۇراقتى بىرىنشىلىكتە 60 ويىن وتكىزگەن «بارىس» ونىڭ 31-ىندە جەڭىس تويىن تويلاسا, 29 كەزدەسۋدە جەڭىلىستىڭ كەرمەك ءدامىن تاتۋعا ءماجبۇر بولدى. 69 ۇپايمەن «شىعىس» كونفەرەنتسياسىنداعى تۋرنير كەستەسىندە 6-ورىن العان جەرلەستەرىمىز گاگارين كۋبوگى جولىنداعى پلەي-وفف كەزەڭىنە شىقتى. قازاقستان كومانداسى وسى ارالىقتا قار­سىلاستارىنىڭ قاقپاسىنا 147 شايبا سوعىپ, ءوز قاقپاسىنا 157 شايبا وتكىزىپ العان. ارينە, سالىستىرمالى تۇردە الىپ قارايتىن بولساق, بۇل جاقسى ناتيجە ەمەس. شايبا سوعۋ كورسەتكىشى بويىنشا ورتاشا ەسەپپەن ءار ويىنعا 2,5 شايبادان عانا كەلەدى.

«بارىستا» جىل سايىن وزگەرىس بولىپ جاتسا دا تەك 27 جاستاعى قورعاۋشى داررەن ءديتستىڭ ناتيجەسى عانا وزگەرمەيدى. ءبىر سوزبەن ايتقاندا, ديتس – «بارىستىڭ» كورىنبەيتىن كوشباسشىسى. قازاقستان ازاماتتىعىن العان كانادالىق حوككەيشىنىڭ كورسەتكىشى شابۋىلداعى ارىپتەستەرىنەن دە جوعارى تۇر. ءتىپتى كوپتەگەن شابۋىلشى ديتس سەكىلدى كورسەتكىشىمەن ماقتانا المايدى. ول 53 ويىندا قارسىلاستار قاقپاسىنا 17 شايبا سوعىپ, 20 رەت ارىپ­تەستەرىنىڭ كوزگە تۇسۋىنە جاعداي جاساعان. پايدالىلىق كوەففيتسيەنتى جاعىنان ديتس – تەك «بارىستاعى» عانا ەمەس, ليگاداعى ۇزدىكتەردىڭ ءبىرى.

سونىمەن قاتار «بارىستا» ءار جىلدارى ۇزدىك ۇشتىك جاساقتالاتىن. ماسەلەن, 2008-2010 جىلدارى كونستانتين گلازاچەۆ, يوزەف شتۋمپەل, ماكسيم سپريدونوۆتىڭ ويىنىنا جانكۇيەرلەر قول سوعاتىن. وسى ۇشەۋىنىڭ ارقاسىندا «بارىس» العاش رەت قۇرلىقتىق حوككەي ليگاسىنىڭ پلەي-وفف كەزەڭىنە شىقتى. 2011 جىلدان 2017 جىلعا دەيىن برەندون بوچەنسكي, داستين بويد, نايدجەل دوۋس «بارىستى» العا سۇيرەدى. بۇلار دا كوپشىلىكتىڭ سۇيىسپەنشىلىگىنە بو­لەندى. بوچەنسكيدىڭ ءبىر ءوزى تاريح. مىسالى, 2011/2012 جىلعى ماۋسىمدا ۇپاي جيناۋ جاعىنان جەكە رەكوردىن جاڭارتتى. كەيىن­نەن ءوز رەكوردىنان 2015/2016 جىلعى ماۋسىمدا (61 ۇپاي) اسىپ ءتۇستى.

بىلتىر كوربەن نايت (20+21), رومان ستارچەنكو (18+17) جانە نيكيتا ميحايليس (17+15) ۇشتىگى وينادى. ال وسى ماۋسىمدا العى شەپتەگى لينۋس ۆيدەلل (9+27), ياكوب ليليا (20+15) جانە نيكيتا ميحايليس (19+15) ۇشتىگى جانكۇيەرلەر كوڭىلىنەن شىق­تى.