ەلىمىزدىڭ كەيبىر وڭىرلەرىندە جەمقورلىق ارەكەتتەردى انىقتاۋعا باعىتتالعان ءىس-شارالار جۇرگىزىلىپ جاتىر. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى ءمالىم ەتتى, دەپ حابارلايدى Egemen.kz
ۆەدومستۆو مالىمەتىنشە, ەلىمىزدىڭ وڭىرلەرىندە مەديتسينالىق اپپاراتتاردى, ونىڭ ىشىندە وكپەنى جاساندى جەلدەتۋ اپپاراتتارىن مەملەكەتتىك ساتىپ الۋ بارىسىندا جەمقورلىق ارەكەتتەردى انىقتاۋعا باعىتتالعان ءىس-شارالار كەشەنى جۇزەگە اسىرىلىپ جاتىر. اتالعان ءىس-شارالار بارىسىندا الماتى, شىمكەنت قالالارىندا, اقمولا, الماتى, جامبىل, باتىس قازاقستان, قىزىلوردا, قوستاناي, ماڭعىستاۋ وبلىستارىندا سوتقا دەيىنگى تەرگەۋ تىركەلدى.
«ماسەلەن, قىزىلوردا وبلىسىندا وبلىستىق دەنساۋلىق باسقارماسى باسشىسىنىڭ ورىنباسارى بورامباەۆا ايىپپۇل (300 اەك مولشەرىندە ايىپپۇل) تولەۋگە سوتتالدى», دەپ اتاپ وتەدى اگەنتتىكتەن.
تاراتىلعان اقپاراتقا سايكەس, ول وكپەنى جاساندى جەلدەتۋ اپپاراتتارىن ساتىپ الۋ بارىسىندا لاۋازىمدىق وكىلەتتىگىن اسىرا پايدالانىپ, تەحنيكالىق سيپاتتاماسىنا جانە تەندەرلىك قۇجاتتاماعا ساي كەلمەيتىن مەديتسينالىق جابدىقتاردى ساتىپ العان. سول ارەكەتى ارقىلى مەملەكەتكە 64,4 ملن تەڭگە شىعىن كەلتىرگەن.
سونداي-اق ۆەدومستۆو سوتقا دەيىنگى ءوندىرىس اياسىندا الماتى قالاسىندا, اقمولا, الماتى, جامبىل, باتىس قازاقستان, ماڭعىستاۋ وبلىستارىندا جالپى سوماسى 1,6 ملرد تەڭگەدەن اسىپ جىعىلاتىن 270 وكپەنى جاساندى جەلدەتۋ اپپاراتىن ساتىپ الۋعا قاتىستى تەكسەرۋ جۇرگىزىپ جاتقاندىعىن اتاپ وتەدى.