ەلىمىزدىڭ 14 وڭىرىندە وڭدەۋ ونەركاسىبى قارقىندى ءوسىپ كەلە جاتىر. بۇل تۋرالى بۇگىن ۇكىمەت وتىرىسىندا ۇلتتىق ەكونوميكا ءمينيسترى اسەت ەرعاليەۆ ايتتى, دەپ حابارلايدى Egemen.kz
«وڭدەۋ ونەركاسىبى سەرپىندى قارقىنمەن وسۋدە. ءوسۋ 6,1 پايىز قۇرادى. 14 ءوڭىر وڭ ءوسۋ كورسەتتى. ەڭ جوعارعى ءوسۋ تەمەكى ونىمدەرى مەن ەلەكترلىك اككۋمۋلياتورلار ءوندرىسىنىڭ ءوسۋى ەسەبىنەن الماتى قالاسى مەن الماتى وبلىسىندا, تاۋارلىق بەتون, تازارتىلعان التىن جانە تەمىرجول لوكوموتيۆتەرى ءوندىرىسىنىڭ ءوسۋى ەسەبىنەن نۇر-سۇلتان قالاسىندا بايقالادى», دەدى 2021 جىلدىڭ قاڭتار-اقپانىنداعى ەلىمىزدىڭ الەۋمەتتىك-ەكونوميكالىق دامۋ قورىتىندىسى جايىندا بايانداعان مينيستر.
مينيستر اتاپ وتكەندەي, وڭدەۋ ونەركاسىبىندە تومەندەۋ 3 وڭىردە بايقالدى. ناقتى ايتقاندا مۇناي وڭدەۋ ونىمدەرى ءوندىرىسىنىڭ قىسقارۋى سالدارىنان اتىراۋ وبلىسىندا, ەت وڭدەۋ جانە ترانسفورماتورلار ءوندىرىسى كولەمدەرىنىڭ ازايۋى سالدارىنان باتىس قازاقستان وبلىسىندا, ترانسفورماتورلار مەن ماقتا ءوندىرىسىنىڭ ازايۋى سالدارىنان تۇركىستان وبلىسىندا تومەندەۋ تىركەلدى.
«ىشكى جانە سىرتقى ينۆەستيتسيالاردى تارتۋ بويىنشا جۇمىس بەلسەندى جۇرگىزىلۋدە. كەن ءوندىرۋ ونەركاسىبىن ەسەپكە الماعاندا, ينۆەستيتسيالاردىڭ ورتاشا ءوسۋى 13,3 پايىزدى قۇرادى», دەدى اسەت ەرعاليەۆ.