مۇحامبەتقالي دۇيسەمباەۆ تۋىندىلارىنىڭ وزەگى – اۋىل تاعدىرى. ارالدىڭ ەكولوگيالىق احۋالىن قالامىنا ارقاۋ ەتكەن سۋرەتشى شىعارمالارىنىڭ ءبىر پاراسى ولكەنىڭ وتكەنى مەن بۇگىنگى كورىنىسىن ايشىقتايدى.
الماتى مۋزەيىندە اشىلعان «كەستەلى تاريح – سىرلى الەم» ساندىك-قولدانبالى ونەر كورمەسىنە قازاقستان سۋرەتشىلەر وداعىنىڭ مۇشەسى, «شابىت» حالىقارالىق فەستيۆالىنىڭ لاۋرەاتى, ورال تاڭسىقباەۆ اتىنداعى الماتى ساندىك-قولدانبالى ونەر كوللەدجىنىڭ وقىتۋشىسى مۇحامبەتقالي دۇيسەمباەۆتىڭ قالامىنان تۋعان 30-عا جۋىق شىعارما قويىلىپتى. كورمەگە كەلۋشىلەردىڭ نازارى سۋرەتشى شىعارمالارىنىڭ الەۋمەتتىك سيپاتىنا عانا ەمەس, گوبەلەندە كوركەم ۇيلەسىم تاپقان ءتۇرلى-ءتۇستى وبرازدارعا اۋاتىنى انىق. Cۋرەتشىنىڭ «جەر انا شاقىرادى», «ارال سەريالارى» ەكولوگيالىق اپاتتى ءوڭىردىڭ تىنىس-تىرشىلىگىنە ارنالعان. قيالى ۇشقىر قىلقالام شەبەرى ءۇشىن جىلدىڭ قاي مەزگىلى بولسىن تارتىمدى دەسەك, «بالالىق شاق», «تەكەمەت باسۋ», «جاس كەلىن», «جايلاۋ», «شەبەر انا», «كورشى», «ت ۇلىپ» سياقتى تۋىندىلارىنداعى كوك بوياۋعا قانىق كەڭ دالانىڭ كورىنىسى كوكتەمنىڭ كەلگەنىن اڭعارتقانداي.
ونەرتانۋشىلار مۇحامبەتقالي دۇيسەمباەۆ شىعارمالارىن بىرنەشە سالاعا ءبولىپ قاراستىرادى. مىسالى, «اتان», «بالالىق شاق», تاعى باسقا دا تۋىندىلارى سيۋرەاليزمگە نەگىزدەلسە, «جايلاۋدا», «جاس كەلىن», «شەبەر انا», «تەكەمەت باسۋ» سياقتى جۇمىستارىنان ليريكا ەسەدى. جايما-شۋاق اۋىل كورىنىسى سۋرەتتەلگەن «جايلاۋ» تۋىندىسى كوككە ورانعان ولكەنى كوز الدىڭىزعا اكەلسە, «تورسىق ۇستاعان قىز», «قىزعالداق» جۇمىستارىندا سۋرەتشىنىڭ وي-قيالى شارىقتاي بەرەدى. كۇردەلى بوياۋ كومەسكى تارتپاي تاقىرىبىمەن ۇندەسە كەتكەن تاعى ءبىر شىعارماسى «ارۋ» دەكوراتيۆتىك ابستراكتسيادا ورىندالىپ, گوبەلەندە تۇران ارۋىنىڭ وبرازى ايشىقتالادى. ارۋدىڭ سۇلۋلىعى, باتىرلىعى كوركەم ۇيلەسىم تاۋىپ, وبرازدى اشا تۇسكەندەي. ايشىقتى كولوريستيكاسىمەن ەرەكشەلەنەتىن «مەنىڭ قازاقستانىم» شىعارماسى ەل تاۋەلسىزدىگىنە ارنالسا, سۋرەتشىنىڭ كەنەپ بەتىندەگى پورترەتتەر سەرياسى ءوز الىندا ۇلكەن تاقىرىپ دەپ ايتۋعا بولادى.
«اجەم بالعىننىڭ ونەگەسىن كورىپ ءوستىم. تەكەمەت باسۋ, الاشا توقۋ سياقتى ۇلتتىق قولونەرىمىزدىڭ وزىق ادىستەرىنىڭ شىعارماشىلىعىمدا كورىنىس تابۋى سوندىقتان دا بولار», دەيدى قىلقالام شەبەرى.
كەنەپ بەتىندە ءتۇرلى-ءتۇستى وبرازداردىڭ ورنەكتەلۋىنىڭ وزىندىك تەحنيكاسى عانا ەمەس, داستۇرىمىزبەن ۇشتاسىپ جاتقان تەرەڭ ءمانى بار. بۇگىندە ەلىمىزدىڭ وڭتۇستىك, سولتۇستىك وڭىرلەرىندە ساقتالىپ قالعان توقىما ونەرى – ۇلتىمىزبەن بىرگە جاساسىپ كەلە جاتقان كيەلى ونەر. كەزىندە الماتىداعى كىلەم فابريكاسى گوبەلەنشىلەر ءۇشىن ساپالى جىپتەردىڭ ءوندىرىسى سانالسا, قازىرگى كەزدە قولدان ءيىرىپ وندىرىسكە ەنگىزۋدىڭ وزىندىك ماشاقاتى بار, ياعني تابيعي جىپتەن توقىلعان كارتينالار ۇزاق ساقتاۋعا كەلمەيدى. سوندىقتان دا وسى توقىما ونەرىندە قولدانىلاتىن بوياۋلار مەن جىپتەردى رەسەي, وزبەكستان, قىرعىزستان جانە قىتاي ەلىنەن الۋعا تۋرا كەلەدى.
قازاق بەينەلەۋ ونەرىنىڭ قارا شاڭىراعى ءارى شىعارماشىلىقتىڭ ۇستاحاناسى سانالاتىن ورال تاڭسىقباەۆ اتىنداعى الماتى ساندىك-قولدانبالى ونەر كوللەدجىنەن 80 جىلدان استام ۋاقىتتا ەلىمىزدىڭ ونەرى مەن مادەنيەتى سالاسىنا كوپتەگەن كاسىبي مامان قانات قاقتى. بۇگىنگى كۇنى دە جاستار اراسىندا بەينەلەۋ ونەرىنە قۇشتار تالاپتى جاستار كوپ. ەڭ باستىسى – مۇحامبەتقالي دۇيسەمباەۆ اتاپ وتكەندەي, تابيعاتى ونەرگە جاقىن تالانتتاردى تاني ءبىلۋ.
الماتى