بۇگىن قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ماجىلىس قاراۋىنا «ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسىن ۇسىندى.
كەلىسىم ەۋرازيالىق ەكونوميكالىق وداققا مۇشە مەملەكەتتەردىڭ باسەكەلەستىك ارتىقشىلىقتارىن قۇرۋعا, وداق شەڭبەرىندە باعالى مەتالدار مەن تاستاردىڭ ەركىن اينالىمى ءۇشىن جاعداي جاساۋعا, سونداي-اق وسى سالادا ءتيىمدى شارالار ازىرلەۋ ءۇشىن ءوزارا ءىس-قيمىل جاساۋعا باعدارلانعان ءوزارا ءتيىمدى ساۋدا-ەكونوميكالىق تەتىكتەردى قالىپتاستىرۋعا باعىتتالعان.
كەلىسىم 18 باپتان تۇرادى جانە:
- باعالى مەتالدارمەن, وڭدەلمەگەن اسىل تاستارمەن مامىلەلەردى جۇزەگە اسىرۋ;
- كيمبەرلي پروتسەسىنىڭ تالاپتارىنا سايكەس مۇشە مەملەكەتتەر اراسىندا وڭدەلمەگەن تابيعي الماستاردىڭ تاسىمالدانۋى;
- مامىلەلەر جاساۋ جانە اسىل تاستاردىڭ سىنىپتامالىق جانە قۇندىق سيپاتتامالارىن انىقتاۋ;
- زاڭدى تۇلعالار مەن جەكە كاسىپكەرلەردە تۇزىلەتىن سىنىقتار مەن قالدىقتاردى جيناۋ جانە مىندەتتى ەسەپكە الۋ;
- ەاەو ىشىندە اكەلىنگەن نەمەسە وندىرىلگەن زەرگەرلىك جانە باسقا دا بۇيىمداردى سىنامالاۋ, تالداۋ جانە تاڭبالاۋ;
- زاڭنامالىق جانە وزگە دە نورماتيۆتىك قۇقىقتىق اكتىلەر جانە ۋاكىلەتتى ورگاندار اراسىنداعى سىنامالىق تاڭبالار بەدەرلەرىنىڭ ۇلگىلەرى تۋرالى اقپارات الماسۋ;
- باعالى مەتالدار مەن اسىل تاستاردىڭ زاڭسىز اينالىمى ءۇشىن جاۋاپكەرشىلىك شارالارىن قولدانۋ.
كەلىسىمدە زەرگەرلىك بۇيىمدارمەن ءوزارا ساۋدادا ەاەو-عا مۇشە مەملەكەتتەردىڭ سىنامالىق تاڭبالارىن ءوزارا تانۋ بەكىتىلەدى. ەگەر زەرگەرلىك بۇيىم قازاقستان اۋماعىندا دايىندالسا جانە سىناقتان وتكىزىلسە, بۇل بۇيىمدى وداق ەلدەرىندە وتكىزۋ كەزىندە قايتا سىنامالاۋ تالاپ ەتىلمەيدى.
سونداي-اق, كەلىسىم ۇلتتىق جانە مەملەكەتارالىق ساپا ستاندارتتارىنىڭ تالاپتارىن مويىندايدى جانە قاتىسۋشى مەملەكەتتەردە وندىرىلەتىن التىندى ساتىپ الۋعا باسىم قۇقىعىن بەكىتەدى.
جالپى, كەلىسىم نورمالارى ەاەو ەلدەرى اۋماعىندا باعالى مەتالدارمەن جانە تاستارمەن وپەراتسيالاردىڭ تولىق ەسەبىن جۇرگىزۋگە جانە سىبايلاس جەمقورلىققا قارسى ءىس-قيمىل جاساۋعا مۇمكىندىك بەرەدى.
ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمگە ەاەو-عا قاتىسۋشى ەلدەر 2019 جىلعى 22 قاراشادا ماسكەۋدە قول قويدى.
بۇگىنگى تاڭدا بەلارۋس پەن رەسەي كەلىسىمنىڭ كۇشىنە ەنۋ شارالارىن اياقتادى. ارمەنيا مەن قىرعىزستاندا جوبا پارلامەنتتەرىنىڭ قاراۋىندا جاتىر.