دەنساۋلىق ساقتاۋ مينيسترلىگى كوروناۆيرۋس «گۇل ارقىلى جۇعادى» دەگەن اقپاراتقا تۇسىنىك بەردى, دەپ حابارلايدى Egemen.kz.
قازاقستاندىقتار دەنساۋلىق ساقتاۋ ءمينيسترى الەكسەي تسويدىڭ ۆيدەوسىن تاراتۋدا. كادردا ول كوروناۆيرۋستىڭ گۇلدەر ارقىلى تارالاتىنىن, سوندىقتان 10 ناۋرىزعا دەيىن گۇلدەرگە جاقىنداۋعا, ولاردى ساتىپ الۋعا جانە يىسكەۋگە تىيىم سالىنادى دەپ ايتقان. بۇل ءازىل ۆيدەو ەكەنى انىق, بىراق كەيبىرەۋلەر ونى شىن دەپ قابىلداعان.
روليك مينيستر تەلەديداردا ءسوز سويلەگەن كەزدە تۇسىرىلگەن, ال داۋىسى مونتاجداۋ بارىسىندا قويىلعان. ۆيدەودا كۆي جۇقتىرۋدىڭ جاڭا ءادىسى تۋرالى ايتقان داۋىستىڭ الەكسەي تسويدىكى ەمەستىگى انىق ەستىلەدى. دەنساۋلىق ساقتاۋ مينيسترلىگى حابارلامانى جوققا شىعاردى.
«قازىرگى كەزدە الەۋمەتتىك جەلىلەر مەن WhatsApp مەسسەندجەرىندە كوروناۆيرۋستىق ينفەكتسيانىڭ تارالۋىنىڭ جاڭا جولى – گۇلدەر ارقىلى بەرىلەتىنى انىقتالعانى تۋرالى اقپارات تاراتىلۋدا. حابارلامادا قازاقستان ازاماتتارىن قاۋىپسىزدىك ماقساتىندا 10 ناۋرىزعا دەيىن گۇل ساتىپ الماۋعا شاقىرعان دەنساۋلىق ساقتاۋ ءمينيسترى الەكسەي تسويدىڭ ۆيدەوسى پايدالانىلعان. قر دەنساۋلىق ساقتاۋ مينيسترلىگى بۇل اقپارات شىندىققا جاناسپايتىنىن رەسمي تۇردە حابارلايدى. بۇل ۆيدەو جالعان», دەپ حابارلادى ۆەدومستۆودان.
ايتا كەتەيىك, COVID-19 ادامنان ادامعا اۋا-تامشى جولدارىمەن جۇعادى. ۆيرۋس جابىق جانە ناشار جەلدەتىلەتىن جەرلەردە تەز تارالادى.
كۆي-ءدىڭ الدىن الۋدىڭ ەڭ ءتيىمدى ادىستەرى – الەۋمەتتىك قاشىقتىقتى ساقتاۋ, ماسكا تاعۋ جانە ادامدار كوپ جينالاتىن ورىندارعا بارۋدان باس تارتۋ.
دەنساۋلىق ساقتاۋ مينيسترلىگى ازاماتتاردى تەكسەرىلگەن رەسمي دەرەككوزدەرگە عانا سەنىپ, ارانداتۋشىلىققا بەرىلمەۋگە ۇندەيدى.